तनहुँ । फागुन ७
नेकपा एमाले तनहुँ क्षेत्र नम्बर १ की उम्मेदवार भगवती न्यौपानेले मतदाताको एक/एक मतले देशको भाग्य कोर्ने भएकाले आफ्नो अमूल्य मत खसाल्नुअघि गम्भीरतापूर्वक विचार गर्नुपर्ने बताएकी छिन् । मतदाताहरुसँगको भेटमा न्यौपानेले निर्वाचनको परिणामले देश बनाउने की देश जलाउने भन्ने निर्णय गर्ने हुँदा देश बनाउने पार्टी एमालेलाई रोज्न आग्रह गरेकी छिन् ।
यस निर्वाचनमा ‘राष्ट्रिय हितको रक्षा र सम्वद्र्धन स्थायित्व, सुशासन र विकासको प्रवद्र्धन’ मुख्य सङ्कल्प बोकेर नेकपा (एमाले) मतदाताहरु समक्ष प्रस्तुत भएको भन्दै उनले नेपालको भाग्य र भविष्य कोर्न एमालेलाई मतदान गर्नुपर्ने बताइन् । देशको अग्रगतिका लागि अस्थिरता, अव्यवस्था र शक्ति केन्द्रहरूको चलखेल सधैंभरि मुख्य बाधकका रूपमा रहँदै आएको भन्दै न्यौपानेले प्रतिनिधि सभाको निर्वाचन केवल मत र प्रतिनिधि चयनको प्रक्रिया मात्र नभई हाम्रो लोकतान्त्रिक अधिकार, संविधानको रक्षा, राष्ट्रिय एकता र जनताको समृद्धि सुनिश्चित गर्ने निर्णायक क्षण भएको बताइन् ।
विगतका वर्षहरूमा राजनीतिक अस्थिरता, योजना कार्यान्वयनको ढिलाई र जनताको अपेक्षित जीवनस्तरमा सुधार नआउनुमा सवै राजनैतिक दल र राजनैतिक व्यक्तिहरुको कहिँ न कहिँ दोष पक्कै छ भन्दै उनले तर आज आगामी पाँच वर्षमा जनताले प्रत्यक्ष अनुभूति गर्न सक्ने विकास र सेवा प्रवाह मार्फत सकारात्मक परिवर्तन गर्ने सु अवसर रहेको बताएकी छिन् । जेन–जी युवाहरूको शान्तिपूर्ण प्रदर्शनका क्रममा केही षड्यन्त्रकारी तत्वहरूले हिंसा मच्चाउँदा निर्दोष युवाहरूले ज्यान गुमाउनु परेको घटनाको नकारात्मक असरबाट आज मुलुक आक्रान्त रहेको बताउँदै न्यौपानेले हरेक दृष्टिले मुलुक सङ्कटको सँघारमा रहेको बताईन् ।
‘अहिले लोकतन्त्रको धज्जी उडाइएको छ र अग्रगतिको यात्रालाई उल्ट्याउने काम गरिएको छ । विकास र समृद्धिको यात्रा अवरुद्ध गरी देशलाई ओरालोतिर धकेलिएको छ । यस गतिहीनता, अवरोध र उल्टो यात्रालाई रोकी देशलाई शान्ति, स्थिरता, स्थायित्व, भ्रष्टाचार नियन्त्रण र सुशासन तथा विकासको बाटोमा अग्रसर गराउनु छ’ न्यौपानेले भनिन् ‘राष्ट्रिय स्वाधीनता र स्वाभिमानको अभिवृद्धि गर्नुछ । यस घटनाले देखाएको सत्य यही हो कि हाम्रो संविधान, हाम्रो कानून र हाम्रो सुरक्षा संरचना कुनै भीड वा षड्यन्त्रकारी तत्वको दबाबमा कमजोर हुनु हुँदैन । संविधानको रक्षा र लोकतन्त्रको सम्मान गर्नु हामी सबैको जिम्मेवारी हो ।’
आगामी फाल्गुन २१ गते सम्पन्न हुने प्रतिनिधिसभाको निर्वाचन, यस सङ्कटको चक्रब्यूहबाट मुलुकलाई मुक्त गर्ने निर्णायक अवसर भएको न्यौपानेले बताइन् । ‘षडयन्त्रपूर्ण ढङ्गले विस्थापित गरिएको जनादेशलाई पुनस्र्थापित गर्ने मूल्यवान मौका हो । आफ्नो देशका समस्या देशभित्रैबाट समाधान गर्न हामी सक्षम छौं भनी संसारलाई देखाउने अनुकूल समय हो ।’ न्यौपानेले भनिन् ‘यस मौकालाई सदुपयोग गर्न हामी सार्वभौम नेपाली जनतासमक्ष हार्दिक अनुरोध गर्दछौं ।’
