तनहुँ । बैशाख १७
व्यास नपा–६ को शिशाघाटमा आयोजित स्वास्थ्य शिविरमा ३२५ जना लाभान्वित भएका छन् । बुधबार र बिहीबार आयोजित उक्त निःशुल्क स्वास्थ्य परीक्षणमा महिला र पुरुष गरी तीन सय पच्चीस जनाले स्वास्थ्य परीक्षण सेवा लिएका छन् ।
उक्त शिविरमा महिलाहरुको पाठेघरको मुखको क्यान्सर, स्तन क्यान्सर, सुर्तीजन्य पदार्थबाट हुने नाक, कान, मुख र घाटीको क्यान्सर रोगको परीक्षण गरिएको थियो । सो क्रममा बीस जनामा क्यान्सर देखिएको जनाईएको छ । उक्त परीक्षणबाट स्तनका आठ जना, पाठेघरको मुखको छ जना र नाक कान घाँटीका छ जनामा क्यान्सर देखिएकाले थप उपचारको लागि भरपुर क्यान्सर अस्पतालमा रिफर गरिएको डा.अस्मिता राणाले जानकारी दिइन् ।
नेपाल रेडक्रस सोसाइटी श्याम्घा उपशाखाको आयोजना, व्यास नगरपालिकाको आर्थिक सहयोग, विपी कोइराला क्यान्सर अस्पताल भरतपुरको प्राबिधिक सहयोग र नेपाल रेडक्रस सोसाइटी जिल्ला शाखाको समन्वयमा निःशुल्क स्वास्थ्य परीक्षण गरिएको हो नेपाल रेडक्रस सोसाइटी श्याम्घा उपशाखाका सभापति प्रमोद न्यौपानेले जानकारी दिए ।
उक्त कार्यक्रममा व्यास नपा ६ का वडाअध्यक्ष कुमार गुरुङ, नेपाल रेक्रस सोसाइटी जिल्ला उप सभापति नारायणी अधिकारी, डा.अस्मिता राणा लगायतले शुभकामना व्यक्त गरेका थिए । उक्त कार्यक्रममा स्वास्थ्य सहजीकरण व्यास नगरपालिका स्वास्थ शाखा व्यास ६ का स्वास्थ केन्द्र,महिला स्वयंसेवीका विशेष सहयोग रहेको थियोे । उक्त शिबिरको व्यास नगरपालिकाका प्रमुख बैकुण्ठ न्यौपानेले कार्यक्रमको उद्घाटन गरेका थिए ।
