तनहुँ । असार २५
आदिकवि भानुभक्त आचार्यको २१३ औँ जन्मजयन्तीको अवसरमा शुक्रबार भानुमा रक्तदान कार्यक्रम आयोजना गरिने भएको छ । भानु नगरपालिका र आदिकवि भानुभक्त जन्मस्थल विकास समितिको संयुक्त आयोजनामा उक्त कार्यक्रम शुक्रबार भानु नगरपालिका वडा नम्बर ४ चुँदीरम्घामा हुने आयोजकले जनाएको छ ।
आदिकवि भानुभक्तको जन्मजयन्ती प्रत्येक वर्ष असार २९ मा राष्ट्रिय स्तरमा मनाइँदै आएको छ । सोही अवसर पारेर यस वर्ष पनि भानु जन्मस्थल क्षेत्रमा विभिन्न कार्यक्रम गरिने क्रममा रक्तदान कार्यक्रम राखिएको हो ।
कार्यक्रमको समन्वय नेपाल रेडक्रस सोसाइटी तनहुँ शाखा दमौली र नेपाल रेडक्रस सोसाइटी भानुभक्त उपशाखा भानुले गर्ने छन् । भानु नगरपालिकाले रक्त अभावका कारण समयमै उपचार नपाएर ज्यान गुमाउनु पर्ने अवस्था आउन नदिन सबैलाई रक्तदानमा सहभागी हुन अनुरोध गरेको छ ।
