देवघाट । साउन १६
देवघाट गाउँपालिका वडा नम्बर ५ भित्र विगत डेढ महिनाभन्दा बढी समय अघिदेखि फोहोर सङ्कलन गर्ने गाडी नआउँदा स्थानीय बासिन्दाहरू निकै प्रभावित बनेका छन् । जेठ महिनादेखि फोहोर सङ्कलन प्रक्रिया ठप्प हुँदा गाउँ तथा टोलभरि दुर्गन्ध फैलन थालेको छ ।
स्थानीय बासिन्दाहरूका अनुसार असार मसान्तसम्मको फोहोरमैला व्यवस्थापन शुल्क नियमित रूपमा असुल गरिए पनि सेवा भने पूर्ण रूपमा ठप्प पारिएको छ । नियमित रूपमा फोहोर नउठ्दा अहिले सामान्य घरहरूमा समेत ४ देखि ५ बोरासम्म फोहोर थुप्रिएर बसेको र जसका कारण सरसफाइ र स्वास्थ्य जोखिम बढेको स्थानीय प्रदिप चौलागाँईले गुनासो गरे ।
चौलागाँईले प्रश्न गरेका छन्, ‘यो जिम्मेवारी कसको हो ? पैसा मात्र उठाउने कि सरसफाइ पनि गर्ने ?’ फोहोरमैला व्यवस्थापनको मुख्य जिम्मेवारी गाउँपालिका, वडा कार्यालय वा सम्बन्धित टोल विकास समितिको हो भन्ने विषयमा स्पष्टता नहुँदा जनता मारमा परेको उनको भनाई छ ।
‘असार मसान्तसम्मको शुल्क बुझाइसकेका छौँ, तर जेठदेखि नै गाडी आएको छैन । सामान्य घरमै ४/५ बोरा फोहोर जम्मा भइसकेको छ’ चौलागाँईले भने ‘सम्बन्धित निकायको ध्यान पैसा सङ्कलनमा मात्रै छ कि सरसफाइमा पनि ?’
लगातार डेढ महिनासम्म फोहोर नउठ्दा फैलन सक्ने रोगव्याधि र वातावरणीय प्रदूषणलाई मध्यनजर गर्दै स्थानीयवासीले गाउँपालिका अध्यक्ष तथा वडाध्यक्षको गम्भीर ध्यानाकर्षण गराएका छन् । चौलागाँईले सन्चार माध्यम मार्फत सम्बन्धित सरोकारवाला, टोल विकास समिति, वडा कार्यालय र गाउँपालिका प्रशासनलाई तत्काल फोहोर सङ्कलन कार्य सुचारु गरी जनताको स्वास्थ्यमाथि भइरहेको खेलबाड रोक्न माग गरेका छन् ।
