तनहुँ । साउन २४
पृथ्वीराजमार्ग भएर तनहुँ जिल्ला प्रवेश गर्ने भारतीय सवारीसाधनका चालकहरूलाई लक्षित गरी तनहुँमा विशेष ट्राफिक सचेतना कार्यक्रम सञ्चालन गरिएको छ ।
जिल्ला प्रहरी कार्यालय तनहुँ र जिल्ला ट्राफिक प्रहरी कार्यालय तनहुँको संयुक्त आयोजनामा जिल्लाको आँबुखैरेनी र शुक्लागण्डकी क्षेत्रमा उक्त कार्यक्रम सम्पन्न गरिएको हो ।
सवारी दुर्घटना न्यूनीकरण गर्ने उद्देश्यले आयोजित कार्यक्रममा भारतीय चालकहरूलाई नेपालको सडक अवस्था, ट्राफिक नियमको पालना तथा सडक सुरक्षाका उपायहरूबारे जानकारी गराइएको थियो ।
अन्य मुलुकका चालकहरू स्थानीय सडक संरचना र नियमबारे पूर्ण रूपमा जानकार नहुँदा दुर्घटनाको जोखिम बढ्ने भएकाले उनीहरूलाई लक्षित गरी सचेतना कार्यक्रम सञ्चालन गरिएको प्रहरीले जनाएको छ । कार्यक्रममार्फत सवारी चलाउँदा अपनाउनुपर्ने सावधानी र नियमबारे चालकहरूलाई सचेत गराइएको थियो ।
