तनहुँ । भदौ २
जिल्ला प्रहरी कार्यालय तनहुँले साउन महिनामा सम्पादन गरेका कार्यहरूको प्रगति विवरण सार्वजनिक गरेको छ । प्रहरीले मंगलबार जारी गरेको प्रेस विज्ञप्ति अनुसार साउन महिनामा अपराध अनुसन्धान, फैसला कार्यान्वयन तथा खोजतलासका क्षेत्रमा उल्लेखनीय प्रगति भएको जनाईएको छ ।
जिल्ला प्रहरी कार्यालय तनहुँका अनुसार अपराध अनुसन्धान तथा नियन्त्रण तर्फ साउन महिनामा जिल्लामा कुल ४७ वटा मुद्दा दर्ता भएका छन् । दर्ता भएका मुद्दामध्ये जघन्य तथा गम्भीर अपराध तर्फ १७ वटा, महिला, बालबालिका तथा ज्येष्ठ नागरिकसँग सम्बन्धित अपराध तर्फ ३ वटा, आर्थिक अपराध तर्फ ५ वटा र अन्य अपराध तर्फ २२ वटा मुद्धा दर्ता गरिएका छन् ।
यसैगरी, चालु मुद्दाका क्रममा ५० जना प्रतिवादीहरूलाई पक्राउ गरी अनुसन्धान प्रक्रिया अघि बढाइएको प्रहरीले जनाएको छ । अदालतको फैसला कार्यान्वयनतर्फ प्रहरीले साउन महिनामा १२ जना फरार प्रतिवादीहरूलाई पक्राउ गरेको छ । पक्राउ परेका प्रतिवादीहरूबाट कुल २ वर्ष ६ महिना कैद सजाय भुक्तान गराउनुका साथै ७९ हजार रुपैयाँ बिगो÷जरिवाना रकम असुल उपर गरिएको छ ।
त्यस्तै महिला, बालबालिका तथा ज्येष्ठ नागरिकसँग सम्बन्धित कुल १८ वटा उजुरी परेका छन् । उजुरी अनुसार पीडिततर्फ १६ वर्ष मुनिका १ जना, २६–३५ वर्षका १० जना, ३६–४५ वर्षका ५ जना र ४६–६० वर्षका २ जना गरी कुल १८ जना रहेको जिल्ला प्रहरी कार्यालयले जनाएको छ ।
त्यस्तै पीडकतर्फ २६–३५ वर्षका ५ जना, ३६–४५ वर्षका ९ जना र ४६–६० वर्षका ४ जना गरी कुल १८ जना रहेका छन् । त्यसैगरि साउन महिनामा कुल २३ जना व्यक्तिहरू हराएको उजुरी परेकोमा १४ जना फेला परेका छन् ।
हराएको उजुरी परेका मध्येमा महिला ६, पुरुष ७, बालक १, बालिका ७ र ज्येष्ठ नागरिक पुरुष २ जना रहेका छन् भने फेला परेका १४ जना मध्येमा महिला ४, पुरुष ३, बालक १, बालिका ५ र ज्येष्ठ नागरिक पुरुष १ जना रहेका छन् । बाँकी हराएका व्यक्तिहरूको खोजी कार्य तथा दर्ता भएका मुद्दाहरूको सुक्ष्म अनुसन्धान जारी राखिएको प्रहरीले जनाएको छ ।
