२६ असार, दमौली
उच्च सतर्कता अपनाउन आग्रह
सेती नदीमा आएको बाढीले तनहूँको शुक्लागन्डकी नपाको दुई वडाका ४३ घर धुरीका १ सय ६० जना भन्दा बढि नागरिक विस्थापित भएका छन् ।
वडा नम्बर ४ र ८ का नदी किनारको वस्तीका ति घरहरुमा नदीको बाढी पसेको वडा नम्बर ८ का अध्यक्ष कृष्णप्रसाद रेग्मीले बताए । वडा नम्बर ४ का १४ र वडा नम्बर ८ का २९ घर बाढिको उच्च जोखिममा परेको हो ।
राती नै नदीमा बाढि आएपछि ति घरका बासिन्दाहरु सबै मध्यरातमै घर छोडेर सुरक्षित स्थानमा गएको वडा अध्यक्ष रेग्मीले बताए । ति बस्तीमा हरेक वर्ष नदीको बाढी पस्दा अनागरिकहरु विस्थापित हुन बाध्य हुँदै आएका छन् । बाढीले मानवीय क्षती नगरेपनि पशु चौपाया र अन्नवाली बगाएको छ ।
तनहूँका प्रमुख जिल्ला अधिकारी बद्रिनाथ अधिकारीले बाढीको कारण विस्थापित भएका नागरिकलाई सुरक्षित स्थानमा सारिएको बताए । बाढिले अहिलेसम्म जिल्लामा कुनै मानवीय क्षती नभएपनि उच्च सतर्कता भने आवश्यक रहेको बताए ।
नदी किनारका बस्तीका बासिन्दालाई सुरक्षित भएर बस्न आग्रह गरिएको प्रमुख जिल्ला अधिकारी अधिकारीले बताए ।
