२० फागुन, दमौली
मानवअधिकार समुह भानु नगरपालिकाले स्थानीय तहको शिक्षा, स्वास्थ्य, खाद्य र आवास सम्बन्धि समस्याहरु सम्बोधन गर्न माग गरेको छ । समुहले बुधबार भानु नगरपालिकाका निमित्त प्रमुख प्रशासकीय अधिकृत शुनिल पाण्डेलाई ज्ञापनपत्र बुझाई मानवअधिकार समुहले पहिचान गरेका समस्याहरु समाधान गर्न माग गरेको हो ।
इन्सेकको सहयोगमा भानु नगरपालिकामा शिक्षा, स्वास्थ्य, खाद्य र आवास अधिकार सम्बन्धि नागरिकलाई सचेतना जगाउने कार्यक्रम सन्चालन भईरहेको भन्दै उक्त कार्यक्रमको सन्दर्भमा गठन गरिएको मानवअधिकार समुहले नगरपालिका भित्र रहेका समग्र मानवअधिकारको विषय र त्यस मध्ये महत्वपुर्ण मानिएको शिक्षा, स्वास्थ्य, खाद्य र आवासको अधिकारलाई सम्बोधनकोलागि विभिन्न समयमा विभिन्न कार्यक्रमहरु आयोजना गर्दै आएको भन्दै ज्ञापनपत्रमा नगरपालिकाको आगामी वर्षको नीति, कार्यक्रम तथा योजनाहरु निर्माण गर्दा मानवअधिकारमैत्री बनाउन माग गरिएको छ ।
शिक्षा, स्वास्थ्य, खाद्य र आवासको अधिकारलाई नेपालको संविधान २०७२ ले मौलिक हकको रुपमा समेत समाविष्ट गरेको र मानवअधिकार समुहले पटक–पटकको बैठक र विभिन्न अन्तरक्रिया कार्यक्रम एवं सरोकारवालाहरुसँगको भेटमा पहिचान गरिएका विषय वस्तुहरुलाई आगामी वर्षको नीति, योजना र कार्यक्रममा सम्बोधन गर्ने विश्वास सहित ज्ञापनपत्र बुझाईएको मानवअधिकार समुह भानुका संयोजक कृष्णराज धमनीयाले बताए ।
ज्ञापनपत्र बुझ्दै निमित्त प्रमुख प्रशासकीय अधिकृत पाण्डेले आगामी कार्यपालिकाको बैठकबाट पारित गरि समुहको मागलाई सम्बोधन गरि आगामी वर्षको नीति तथा कार्यक्रम मार्फत सम्बोधन गर्ने प्रतिबद्धता जनाए ।
