देवघाट अनलाइन
दमौली, बैशाख ७
नेपाली काँग्रेसले मतदाता प्रभावित पार्न बृद्धबृद्धालाई दोसल्ला र फलफुल वितरण गरेको छ । बैशाख ७ गते मातातिर्थ औंशीको अवसरमा नेपाली काँग्रेसले व्यास नपा ३ दमौली स्थित सम्पर्क कार्यालयबाट ७० वर्ष उमेर पार गरेका बृद्धाहरुलाई भेला गरि दोसल्ला ओढाउने तथा फलफुल वितरण गरेको छ ।
तनहुँ क्षेत्र नम्बर १ का नेपाली काँग्रेसका उम्मेदबार गोविन्द भट्टराई सहित नेपाली काँग्रेसका महामन्त्री विश्वप्रकाश शर्मा, केन्द्रिय सदस्य शंकर भण्डारी र प्रदेश सभाका सांसद अशोककुमार श्रेष्ठ लगायतले बृद्धाहरुलाई दोसल्ला ओढाई सम्मान गरेको र फलफुल पनि वितरण गरेका थिए ।
जिल्ला निर्वाचन अधिकारी हरिप्रसाद ढकालले मतदाता प्रभावित पार्ने कुनै पनि काम गरिनु आचार संहिताको उल्लंघन भएको बताए । आफुले यसबारेमा जानकारी पाए लगत्तै उक्त कार्यक्रम तत्काल रोक्न आग्रह गरेको ढकालले बताए ।
निर्वाचन आयोगले जारी गरेको निर्वाचन आचार संहिताको १३ नम्बर बुँदाको झ नम्बरमा कुनै पनि संघ सस्था तथा व्यक्तिलाई नगद वा जिन्सी वितरण गर्न, अनुदान दिन, आर्थिक सहायता तथा चन्दा र पुरस्कार दिन नहुने उल्लेख छ ।
