देवघाट, साउन १३
देवघाट गाउँपालिकाले छोरी पढाउ, सुन्तला लगाउ कार्यक्रम सन्चालन गर्ने भएको छ । सुन्तला उत्पादनमा धेरै भन्दा धेरै गाउँपालिकाबासीलाई आवद्ध गराउने उद्देश्यले यस्तो कार्यक्रम ल्याईएको गाउँपालिकाले जनाएको छ । गत आर्थिक वर्षबाट सन्चालित उक्त कार्यक्रम चालु आर्थिक वर्षमा पनि निरन्तरता दिईएको छ ।
छोरीलाई विद्यालय पठाउने घरलाई निशुल्क सुन्तलाको विरुवा वितरण गर्ने देखी अन्य सहुलियतका कार्यक्रम उपलब्ध गराउने उक्त योजनामा रहेको देवघाट गाउँपालिकाका कृषि शाखाका प्रमुख बलबहादुर सिकर्मीले बताए । उनका अनुसार उक्त कार्यक्रमलाई महिला शसक्तिरणको कार्यक्रमसँग जोडेर सन्चालन गरिने छ । सुन्तलाको पकेट क्षेत्रमा निशुल्क सुन्तलाको विरुवा वितरण गर्न सुन्तला नर्सरीको स्थापना गरिने सिकर्मीले बताए ।
वडा नम्बर ३ मा स्थापना गरिएको सुन्तला नसर्री
देवघाटको वडा नम्बर, १, २, ३ र ४ मा सुन्तलाको पकेट क्षेत्र बनाईने छ । उक्त क्षेत्रमा सुन्तलाको राम्रो उत्पादन पनि हुँदै आएको छ । अहिलेको सुन्तला पकेट क्षेत्रलाई थप प्रभावकारी बनाई सम्भाव्यताको आधारमा थप सुन्तला पकेट क्षेत्र बनाईने सिकर्मीले बताए । सुन्तलाको उत्पादन अझ बृद्धि गर्न प्राविधिक सहयोग, मल, विउ, भिटामिन र तालिमको व्यवस्था गरिनेछ । उत्पादनमा आधारित अनुदान समेत दिईनेछ ।
त्यसैगरि सुन्तलाको व्यवसायीकरण र बजारीकरण मार्फत गाउँपालिकाको पहिचान स्थापित गरिने छ । सहकारी संस्था मार्फत उत्पादनको बजारीकरण गरिने नीति रहेको गाउँपालिकाका अध्यक्ष तिलबहादुर थापाले जानकारी दिए ।
