देवघाट, कार्तिक १
देवघाट गाउँपालिकाको वडा नम्बर ५ को टाउन चोक देखी नमस्ते गार्डेन रिसोर्ट सम्म पहुँच मार्ग खुलाईएको छ । करिब २ सय मिटर लम्बाईको उक्त बाटो यस अघि ३ मिटर चौडाइ रहेकोमा बुधबारबाट ६ मिटरको बनाईएको छ ।
टाउन चोक देखी महेश मार्गसम्मको उक्त मार्ग करिब २ वर्ष अगाडी नै राममन्दिरसम्म विस्तार गरिएको थियो । राम मन्दिरसम्म पुगेर रोखिएको उक्त बाटो निरन्तरको संवाद र प्रयास पछि जग्गाधनीहरुको सहमतीमा अहिले उक्त बाटो खुलाउन सफल भईएको चक्रवर्ती मणिमुकुन्देश्वर टोल बिकास संस्थाका सचिव रामहरि पुडासैनीले बताए ।
देवघाट गाउँपालिका प्रबक्ता एवं वडा नम्बर ५ का वडा अध्यक्ष पूर्णबहादुर कुँवरको नेतृत्वमा टाउन चोक देखि नमस्ते गार्डेन रिसोर्टसम्म जाने भित्री बाटोलाई विस्तार गरि ६ मिटरको बनाईएको थियो । पहिला चौडाइ ३ मिटरको भएपनि अहिले समयको माग अनुसार स्तरोन्नती गरि ६ मिटर चौडाईको बनाईएको वडा अध्यक्ष कुँवरले बताए ।
चक्रवर्ती मणिमुकुन्देश्वर टोल बिकास संस्थाका अध्यक्ष अनिल मिश्रले सबैको प्रयन्त र प्रयासमा उक्त बाटो खोल्न सफल भएको बताए । सचिव पुडासैनीले ८ वर्ष देखि पटक–पटक समन्वय गर्दा पनि सफल नभएपनि सबैको प्रयासमा अहिले आएर सफल भएको बताए । उक्त मार्ग खुलाउन महेश सन्यास आश्रमले ठुलो सहयोग गरेको सचिव पुडासैनीले बताए । त्यस्तै समाजसेवी रामनाथ मिश्रले पनि उक्त मार्ग खुलाउन ठुलो सहयोग गरेको पुडासैनीले बताए ।
बाटो खुलाउने क्रममा वडा अध्यक्ष कुँवर, वडा सदस्यहरु बुद्धि बहादुर पाण्डे र कमला गुरुङ, देवघाट खानेपानी तथा सरसफाइ उपभोक्त समितिका अध्यक्ष सालिग्राम मिश्र (सुरज) तथा टोल विकास संस्थाका पदाधिकारीहरुको उपस्थिती रहेको थियो ।
