दमौली, माघ २३
व्यास नपा–४ का युवा अभियन्ता महम्मद गफ्फारले विद्यालयको सौचालय मापदण्ड अनुसार बनाउन स्थानीय तहहरुको ध्यानाकर्षण गराएका छन् । मंगलबार भानु नगरपालिका, बन्दिपुर गाउँपालिका, आबुँखैरेनी गाउँपालिका र देवघाट गाउँपालिकामा ध्यानाकर्षण पत्र बुझाउँदै उनले सो माग गरेका हुन् ।
सरकारी तथा गैरसरकारी कलेज तथा विद्यालयहरुमा विद्यार्थीको संख्या अनुरूप शौचालय नपाईएको, शौचालयमा चुकुल नरहेको, पानीको पर्याप्ता नरहेको तथा शौचालय सरसफाईको कमिले निकै दुर्घन्धित रहेको हुँदा यसले विद्यार्थीमा पर्ने मनोवैज्ञानिक असरलाई ध्यानमा राख्दै सम्पूर्ण कलेज तथा विद्यालयहरुमा शौचालयको संख्या बढाउन र मापदण्ड अनुसारको व्यवस्थापन गर्न माग गरेका हुन् ।
साथै स्थानीय तहले शिक्षण संस्थाको सौचालयको अवस्था नियमित अनुगमन गर्न र मापदण्ड अनुसार सन्चालन नगरेको पाईए कारवाही गर्न पनि ध्यानाकर्षण पत्र मार्फत माग गरेका छन् ।
व्यास नगरपालिकाले माघ पहिलो साता दमौलीका फोहोर मैला नउठाएपछि युवा अभियन्ता गफ्फारले आफै फोहोर उठाएर दमौलीबासीको मन जितेका थिए । पछिल्लो समय उनले विद्यालयको सौचालय मापदण्ड अनुसार बनाउन स्थानीय तहको ध्यानाकर्षण गराएका हुन् । उनले केही दिन अघि व्यास नगरपालिकामा पनि उक्त ध्यानाकर्षण पत्र बुझाईसकेका छन् ।
