देवघाट, फागुन १९
देवघाट गाउँपालिका–५ स्थित श्रीकृष्ण प्रणामी सेवा समिति श्री प्राणनाथ अनाथ सेवा आश्रममा जारी श्रीमद्भागवत श्रीकृष्ण प्रणामी धर्मजागनी ज्ञान महायज्ञको तेश्रो दिन शनिबार तनहुँ क्षेत्र नम्बर १ का सांसद डा.स्वर्णिय वाग्लेको प्रमुख आतिथ्यतामा सम्पन्न भयो । गत विहिबारबाट सुरु भएको उक्त महायज्ञमा आतिथ्याकोलागि शनिबार सांसद वाग्ले देवघाट आएका थिए ।
महायज्ञको विहिबार आद्यधर्मपीठ श्री ५ नवतनपुरीधाम जामनगर गुजरातका पिठाधीश्वर श्रीकृष्ण प्रणामी धर्माचार्य अनन्तश्री विभुषित जगदगुरु आचार्य श्रीकृष्णमणिजी महाराजले उद्घाटन गरेका थिए ।
महायज्ञ मुल समारोह समितिका संयोजक राजेन्द्र रिजालको संयोजकत्वमा भईरहेको उक्त महायज्ञमा सहयोगी दाताहरु बढ्दै गएको आयोजकले जनाएको छ । कार्यक्रममा सांसद वाग्लेले महायज्ञका दाताहरुलाई आयोजकको तर्फबाट सम्मान गरेका थिए ।
देवघाट स्थित श्रीकृष्ण प्रणामी सेवा समिति श्री प्राणनाथ अनाथ सेवा आश्रममा श्रीकृष्ण मन्दिर निर्माण तथा आश्रम सन्चालनकोलागि आर्थिक सहयोग जुटाउने उद्देश्यले विहिबारबाट सो महायज्ञ आयोजना गरिएको हो । महायज्ञ फागुन २३ गतेसम्म चल्नेछ । आश्रम परिसरमा पाँच करोडको लागतमा कलात्मक श्रीकृष्ण प्रणामी मन्दिर निर्माण गरिएको छ ।
उक्त महायज्ञले हिन्दु धर्मको संरक्षणकोलागि योगदान दिने तथा भरतपुर भ्रमण वर्ष २०२४ लाई सफल बनाउन पनि सहयोग गर्ने अपेक्षा लिईएको रिजालले बताए । उक्त श्रीकृष्ण प्रणामी मन्दिरले धार्मिक पर्यटकलाई आकर्षित गर्ने अपेक्षा समेत लिईएको छ ।
