दमौली, चैत ११
नयाँ वर्ष २०८१ को अवसरमा भिमाद नपा–५ स्थित मिछुर्लुङ्गमा खुल्ला मौलिक कौराहा प्रतियोगिता तथा साँस्कृतिक कार्यक्रम हुने भएको छ ।
मिछुर्लुङ्ग विकास समितिको आयोजनामा आगामी वैशाख १ गते मिछुर्लुङ्गमा मौलिक कौराहा प्रतियोगिता आयोजना गर्न लागिएको आइतवार मिछुर्लुङ्गमा आयोजित पत्रकार सम्मेलनमा जानकारी दिइयो ।
मगर समुदायको लोकप्रिय मौलिक नाँच कौराहाको संरक्षण गरी गाउँ पर्यटन प्रर्बद्धन गर्ने र पर्यटन गतिविधिबाट स्थानीयको आयआर्जनमा अभिवृद्धि गर्ने उदेश्यका साथ प्रतियोगिता गरिएको समितिका अध्यक्ष एवम् मुल संयोजक नरेन्द्र थापाले जानकारी दिए ।
प्रतियोगितामा प्रथम, द्वित्तीय, तृतीयले क्रमशः ७५ हजार, ५० हजार, २५ हजार र सान्त्वना दुई समुहले १०÷१० हजार रुपैया पाउनेछन् । घटिमा १५ र बढिमा २० जना एक समुहमा सहभागि हुनुपर्ने छ ।
उक्त कार्यक्रममा लोकदोहोरी गायक राजु परियार र गााियका शिला आलेको समेत साँस्कृतिक प्रस्तुती समावेश गरिएको प्रतियोगिताका सह–संयोजक हर्क बहादुर रानाले जानकारी दिए । मगर लाफा भिलेजका साथै मिछुर्लुङ्ग साँस्कृतिक समुहको सह–आयोजनामा हुने उक्त प्रतियोगितामा १५ समुहको सहभागिता रहने अनुमान गरिएको छ ।
साँस्कृतिक, प्राकृतिक र जैविक विविधताले धनी गाउँ मिछुर्लुङ्गमा सामुदायिक होमस्टे सञ्चालनमा छन् । २४ घरमध्ये दुई घर दलित समुदाय छन् । मिछुर्लुङ्ग भ्यू–टावरबाट सुन्दर हिमाली दृश्यावलोकन समेत गर्न सकिन्छ ।
