देवघाट, असार २२
नारायणी नदीमा आएको बाढीले नारायणगढस्थित नारायणी पुल र देवघाटमा चेतावनी तह नाघेको छ । नारायणी पुल जलमापन केन्द्र र देवघाट जलमापन केन्द्रले चेतावनी तह नाघेको रेकर्ड गरेका हुन् । चेतावनी तह भनेको आवश्यक सतर्कता अपनाउनुपर्ने अवस्था हो । नारायणी पुलमा जलसतह ११.२६ मिटर पुगेको छ भने देवघाटमा जलसतह ८.५१ मिटर पुगेको छ ।
नारायणी पुलमा ११ मिटर र देवघाटमा ७.३ मिटर जलसतहलाई चेतावनी तह मानिन्छ । देशभर लगातार वर्षा भइरहेकाले जलसतह अझै बढ्ने सम्भावना छ । नारायणीले चेतावनीको तह नाघेसँगै नदीको तल्लो तटीय क्षेत्रका बासिन्दालाई सचेतना अपनाउन भनिएको छ । जिल्ला प्रशासन कार्यालय चितवन र नवलपुरले सूचना जारी गर्दै सचेत रहन नागरिकलाई आब्हान गरेका छन ।
