देवघाट, असोज २८
देवघाट गाउँपालिका वडा नम्बर ३ का युवाहरुलाई शिक्षक तथा जनजाती नेता सिद्धान्त थापा मगरले भलिवल प्रदान गरेका छन् । वडा नम्बर ३ को लुङग्रिङ र नाल्वुङका युवाहरुलाई थापाले सोमबार आफ्नै व्यक्तिगत खर्चमा ६ थान भलिवल र २ सेट जर्सी उपलब्ध गराएका छन् ।
दशैं र तिहारको बिदामा युवाहरु जाँड, रक्सी तथा लागुपदार्थ र मद्यपानको कुलतमा नलागुन् र खेलकुँदमा व्यस्त होउन भन्ने उद्देश्यले भलिवल प्रदान गरेको बन्दिपुर गाउँपालिका–६ खहरेटारमा रहेको सेतीगंगा आधारभुत विद्यालयका प्रअ समेत रहेका थापा मगरले बताए ।
त्यसैगरि देवघाट गाउँपालिकामा भुगोल सुहाउँदो भलिवल खेलप्रति युवाहरुलाई आकर्षण बढाउन र भलिवलको केन्द्र बनाउन आफुले सहयोग गरेको उनले बताए । नेपाल मगर संघका केन्द्रीय निर्वाचन समितिका संयोजक समेत रहेका थापाले यस अघि पनि पटक पटक देवघाट–२ र ३ का युवाहरुलाई विभिन्न खेल सामाग्रीहरु सहयोग गर्दै आएका छन् ।
