दमौली, माघ ५
बन्दीपुर गाउँपालिकाका ९४३ जना किशोरीहरूलाई पाठेघरको मुखको क्यान्सर रोकथाम तथा नियन्त्रण विरुद्धको एच पि भि खोप लगाइने भएको छ ।
गाउँपालिकाभित्रका विद्यालयमा कक्षा ६ देखि १० सम्म अध्ययनरत विद्यार्थीहरूलाई लक्षित गरी यही माघ २२ गतेबाट गाउँपालिकाले खोप अभियान सञ्चालन गर्दैछ । अभियानका लागि गाउँपालिकाले स्वास्थ्य शाखा मार्फत स्वास्थ्य स्वयंसेविकाहरूलाई अभिमुखीकरण समेत प्रदान गरेको छ ।
विद्यालय पढ्नेहरूको हकमा ६ देखि १० कक्षासम्मका किशोरीहरू र विद्यालय नजानेहरूको हकमा भने १० वर्षदेखि १४ वर्षसम्मका उमेरका किशोरीहरूलाई यो खोप लगाइने गाउँपालिका स्वास्थ्य शाखाका प्रमुख किरण श्रेष्ठले जानकारी दिएका छन् ।
महिलालाई हुने पाठेघरको मुखको क्यान्सरबाट जोगाउने उद्देश्यले किशोरीहरूलाई एचपीभी नामक भाइरसविरुद्ध उक्त खोप दिन लागिएको हो ।
नेपालमा पाठेघरको क्यान्सर महिलाहरूमा हुने क्यान्सरमध्ये शीर्ष स्थानमा छ भने महिला र पुरुष दुवैको गणना गर्दा पनि फोक्सोको क्यान्सरपछि दोस्रो स्थानमा छ । पाठेघरको क्यान्सर प्रायः ह्यूमन प्यापिलोमाभाइरस (एचपीभी) का कारण हुने बताइन्छ । यसलाई खोपले रोकथाम गर्न सकिने क्यान्सर मानिन्छ ।
