देवघाट, माघ ५
पशुपतीनाथ परिसरमा गत साउन महिनामा एक महिने कोटीहोम लगाएर चर्चामा आएका बालयोगेश्वर भनिने बिजयकृष्णमुर्तीले देवघाटधाममा जारी देवघाट महा–महोत्सव कसैले बिथोल्न खोजे प्रतिकार गर्ने चेतावनी दिएका छन् । शनिबार देवघाट महा–महोत्सवलाई सम्बोधन गर्दै उनले कसैले महा–महोत्सव अवरोध गर्न खोजे हिन्दु सेना उतार्ने चेतावनी दिए ।
‘कसैले महा–महोत्सव अवरोध गर्न खोज्छ भने हामीलाई जानकारी गराउनु, जहाज चार्टर गरेर हुन्छ की, हेलिकप्टरमा आएर हुन्छ की, मोटरसाईकलमा आएर हुन्छ की हिन्दु सेना उतार्छौ’ उनले भने ‘हिन्दु सेनाले देवघाटमा सुरक्षा दिएर महा–महोत्सव सफल बनाएरै छाड्छौं ।’ यस्ता महायज्ञ र धार्मिक कार्यक्रममा अवरोध आउनु स्वभाविक भएको भन्दै उनले यस्ता साना तिना अवरोधलाई चिरेर अगाडी बढ्नु पर्ने बताए ।
देवघाट महा–महोत्सव असफल पार्न विश्व हिन्दु महासंघ चितवनको नेतृत्वमा गतिविधि भईरहेको सन्दर्भमा शनिबार महा–महोत्सव आएका बिजयकृष्णमुर्तीले सो चेतावनी दिएका हुन् । महा–महोत्सवका संकल्पकर्ता इश्वरकृष्ण महाराजले पनि महा–महोत्सव आयोजना गरेकै दिनबाट आफुलाई विभिन्न धम्की र बार्गेनिङ आउन थालेको बताए । उनले कसैको धम्कीले पनि आफु नडराउने भन्दै महा–महोत्सवमा संकलित रकम पारदर्शी रुपमा देखाउने प्रतिबद्धता जनाए ।
