काठमाडौं, फागुन १८
नेकपा एमालेले आफ्ना जनवर्गीय संगठनहरूका केन्द्रीय समिति र पदाधिकारीहरूको छरितो संरचना बनाउने निर्णय गरेको छ । केन्द्रीय सचिवालयको आइतबारको बैठकले जनसंगठनका केन्द्रीय कमिटीको आकार तोकेको हो ।
महासचिव शंकर पोखरेलका अनुसार जनसंगठनमा केन्द्रीय कमिटी, सचिवालय र स्थायी कमिटीको अभ्यास भइरहेकोमा अब स्थायी कमिटीको संरचना नराख्ने निर्णय भएको छ ।
सम्बन्धित संगठनले आफ्ना विधानको माध्यमबाट सो संरचना परिवर्तन गर्ने महासचिव पोखरेलले बताए । एमाले सचिव पद्मा अर्यालका अनुसार ठूला जनसंगठनको केन्द्रीय कमिटी १५० सदस्यीय र सानाको ९९ रहने र सबै संगठनका पदाधिकारी ९ जनामा सीमित गरिने भएको छ ।
सचिवालय बैठकको निर्णय कार्यान्वयन गर्न सोमबार बिहान जनसंगठन संयन्त्रको बैठक बोलाइएको छ । एमालेले चैत महिनाभित्र सबै जनसंगठनलाई चैत मसान्तसम्म अधिवेशन सक्न समय सीमा दिइसकेको छ ।
