तनहुँ । जेठ ७
जिल्ला खेलकुद विकास समिति तनहुँको आयोजनामा बुधबारदेखि दमौलीमा भलिबल प्रशिक्षण कार्यक्रम सुरु भएको छ ।
समितिले दक्ष खेलाडी उत्पादन गर्ने उद्देश्यले व्यास नगरपालिका–३ स्थित खुल्ला मैदानमा १५ दिने प्रशिक्षण कार्यक्रम सञ्चालन गरेको हो ।
प्रशिक्षण कार्यक्रमको उद्घाटन गण्डकी प्रदेशसभा सदस्य अशोककुमार श्रेष्ठले गरेका छन् । उद्घाटन समारोहमा उनले खेलकुदको माध्यमबाट युवा पुस्ताको समग्र विकास सम्भव रहेको बताएका छन् ।
समितिका अध्यक्ष अनिल पाण्डेले आगामी १५ दिनसम्म सञ्चालन हुने यस प्रशिक्षण कार्यक्रमले जिल्लामा खेलकुदको स्तर उकास्न र नयाँ खेलाडीहरूको उत्थानमा महत्वपूर्ण भूमिका खेल्ने विश्वास व्यक्त गरेका छन् ।
