तनहुँ । असार १८
आँबुखैरेनी गाउँपालिकाले स्थानीयस्तरमा उत्पादन हुँदै आएका १२ प्रमुख बालीहरूको वैज्ञानिक उत्पादन तालिका तथा जैविक प्रविधिको जानकारी समेटिएको ‘कृषि बाली पात्रो’ सार्वजनिक गरेको छ ।
गाउँपालिकाको कृषि शाखाको पहलमा तयार गरिएको सो पात्रोको उद्देश्य कृषकलाई सही समयमै बाली रोपाइँ, स्याहार, मल व्यवस्थापन, रोग नियन्त्रण तथा कटाइ–थन्काइसम्बन्धी समुचित जानकारी प्रदान गर्नु रहेको छ ।
गाउँपालिकाका कृषि शाखा प्रमुख सन्तोष केसी ले बताए अनुसार, ‘यो पात्रोले कृषकहरूलाई मौसमअनुकूल खेती प्रणाली अपनाउन मद्दत पु¥याउनेछ । साथै, जैविक खेतीका प्रविधिहरूको प्रचारप्रसार गर्दै दीगो कृषि प्रणालीमा अभिप्रेरित गर्नेछ ।’
पात्रोमा मकै बाली, धानबाली, लहरेबाली, सुन्तलाबाली, हरियो तरकारीबाली, गोलभेडाबाली, मौरीपालन, अदुवाबाली, फलफूल लगायत १२ विभिन्न बालीहरूका विशेषता, बिउ छनोटदेखि भण्डारणसम्मका चरणहरू, र जैविक मलको प्रयोग विधि उल्लेख गरिएको छ ।
गाउँपालिका अध्यक्ष, वडाध्यक्ष, प्राविधिक कर्मचारी, कृषक प्रतिनिधि लगायतको उपस्थितिमा एक औपचारिक कार्यक्रममा उक्त पात्रो सार्वजनिक गरिएको हो ।
स्थानीय किसानहरूका लागि मार्गदर्शकको रूपमा काम गर्ने अपेक्षासहित सार्वजनिक गरिएको यो पात्रो हरेक वडाका कृषक समूहहरूलाई वितरण गरिने गाउँपालिकाले जनाएको छ ।
