तनहुँ । मंसिर २९
प्रदेश लोक सेवा आयोग, गण्डकी प्रदेश तथा भिमाद नगरपालिका, तनहुँका पदाधिकारी र कर्मचारीहरुबीच सोमबार भिमाद नगरपालिकाको सभाहलमा अन्तरक्रिया कार्यक्रम सम्पन्न भएको छ ।
स्थानीय तहमा पदपूर्ति सम्बन्धी व्यवस्था, रिक्त पदमा पदपूर्तिको अवस्था, पाठ्यक्रम सम्बन्धि पृष्ठपोषण, कार्यप्रवाह तथा विविध समसामयिक विषयमा केन्द्रित रहेर अन्तरक्रिया भएको थियो ।
भिमाद नगरपालिकाका नगर प्रमुख दधिराज सुबेदीको अध्यक्षतामा भएको उक्त कार्यक्रममा लोक सेवा आयोग, गण्डकी प्रदेशका अध्यक्ष विष्णुप्रसाद नेपाल, प्रदेश लोक सेवा आयोगकी सदस्य कल्पना लम्साल, नगर उपप्रमुख शारदा खनाल, प्रदेश लोक सेवा आयोग, गण्डकीका सचिव शिला बराल सापकोटा तथा भिमाद नगरपालिकाका प्रमुख प्रशासकीय अधिकृत कमलप्रसाद पुन लगायतले मन्तव्य राखेका थिए ।
उक्त कार्यक्रममा भिमाद नगरपालिकामा कार्यरत कर्मचारीहरूबाट पेश भएका पदपूर्ति, सरुवा, तह–वृद्धि, बढुवा, कामकाज प्रक्रिया, सेवा प्रवाह तथा कार्यप्रवाहसँग सम्बन्धित समस्या, गुनासो तथा सुझावहरूलाइ सम्बोधन गर्दै कार्यक्रमका प्रमुख अतिथि लोक सेवा आयोग, गण्डकी प्रदेशका अध्यक्ष विष्णुप्रसाद नेपालले समस्याहरुको समाधानको उपायबारे जानकारीका साथै आवश्यक निर्देशन तथा सुझाव प्रदान गरेका थिए ।
