काठमाडौं । फागुन ३०
नेकपा एमालेले समानुपातिकतर्फ चयन हुने १६ जना सांसदको नाम टुंगो लगाएको छ । शनिबार पार्टी अध्यक्ष केपी शर्मा ओलीको निवास गुण्डुमा बसेको सचिवालय बैठकले १६ जनाको नाम निर्वाचन आयोगमा सिफारिस गर्ने निर्णय गरेको हो ।
बैठकले जनजाति क्लस्टरतर्फ महिलामा भूमिका सुब्बा र गंगादेवी श्रेष्ठ तथा पुरुषतर्फ रामबहादुर थापा मगर र कुलभक्त शाक्यलाई सिफारिस गरेको छ । खस–आर्य क्लस्टरतर्फ महिलामा पद्मा अर्याल, टुकाभद्रा हमाल र एशुदा कुमारी बराल (पिछडिएको क्षेत्र) चयन भएका छन् भने पुरुषतर्फ गुरु प्रसाद बराल र पुष्पराज कंडेलको नाम सिफारिस गरिएको छ ।
त्यसैगरी थारु क्लस्टरतर्फ पुरुषमा कृपाराम राणा चयन भएका छन् । दलित क्लस्टरतर्फ महिलामा विष्णुमाया वी.के. र नीता घटानीलाई सिफारिस गरिएको छ । मधेसी क्लस्टरतर्फ महिलामा रिङ्ला यादव र यशोधा कुमारी यादव तथा पुरुषतर्फ चन्द्रेश्वर मण्डल चयन भएका छन् । यस्तै मुस्लिम क्लस्टरतर्फ महिलामा साजिदा सिद्दीकीलाई सिफारिस गरिएको एमालेले जनाएको छ ।
