तनहुँ । असार २०
बाग्मती प्रदेश सरकारद्वारा आँबुखैरेनी गाउँपालिकालाई चितवन भरतपुर महानगरपालिका र इच्छाकामना गाउँपालिकाका विभिन्न भागमा जोड्न त्रिशुली नदीमा दुई वटा झोलुङ्गे पुल निर्माण हुने भएका छन् । उक्त दुई पुल निर्माणका लागि एक करोड रुपैयाँ बजेट विनियोजन भएको छ ।
आँबुखैरेनी गाउँपालिका–५ र चितवनको भरतपुर महानगरपालिका–२९ चितवन तथा आँबुखैरेनी गाउँपालिका–४ र चितवनको इच्छाकामना गाउँपालिका जोड्नकोलागि त्रिशूली नदीमा २ वटा झोलुङ्गे पुल निर्माणका ५० लाखका दरले बजेट विनियोजन भएको हो ।
दुई स्थानमा झोलुङ्गे पुल बनेपछि सर्वसाधारणलाई आवतजावतमा सहज हुने विश्वास गरिएको गाउँपालिका अध्यक्ष शुक्र चुमानले बताए । आँबुखैरेनी गाउँपालिकाको आवश्यकता र अनुरोधलाई विशेष प्राथमिकता राखेर बाग्मती प्रदेश सरकारको भौतिक पुर्वाधार मन्त्रालयबाट बजेट विनियोजन भएको अध्यक्ष चुमानले बताए ।
अध्यक्ष चुमानका अनुसार बागमती प्रदेश सरकारका भौतिक पूर्वाधार विकास मन्त्री डा. दिनेशचन्द्र देवकोटा र मन्त्रालयका प्रदेश सचिव इञ्जिनियर ईश्वरचन्द्र मरहठ्ठाको विशेष भूमिका रहेको छ ।
