तनहुँ । साउन २०
तनहुँको भानु नगरपालिकामा रासायनिक मलको तीव्र अभाव भएपछि किसानहरू मार्कामा परेका छन् । नगरपालिकाको कृषि विकास शाखाले माग गरेअनुसारको मल प्राप्त नहुँदा बजारमा रासायनिक मलको हाहाकार भएको हो ।
कृषि विकास शाखाले गत साउन १२ गते पत्र पठाउँदै ३ हजार ४० बोरा युरिया, ६० बोरा डिएपी र १० बोरा पोटास मलको माग गरेको थियो । तर गण्डकी प्रदेश सरकारको कृषि, भूमि व्यवस्था तथा सहकारी मन्त्रालयले साउन १५ गतेको पत्रमार्फत भानुका लागि कुल मागको १० प्रतिशत पनि नपुग्ने गरी मात्र मल उपलब्ध गराएको छ ।
संघीय सरकारबाट प्राप्त कोटा अनुसार भानु नगरपालिकाकालागि २० टन (४०० बोरा) युरिया र २० टन (४०० बोरा) डिएपी मात्रै विनियोजन गरिएको कृषि शाखाले जनाएको छ ।
मलको परिमाण निकै कम भएपछि सोमबार बसेको स्थानीय मल वितरण व्यवस्थापन समितिको बैठकले प्राप्त सीमित मलको वितरण योजना बनाएको छ । नगरपालिकाले प्राप्त भएको मललाई ‘अनुदानको मल वितरण व्यवस्थापन कार्यविधि २०८२’ को दफा २८ बमोजिम न्यायोचित तरिकाले किसानहरूलाई बाँड्ने तयारी थालेको छ ।
संघ तथा प्रदेशबाटै न्यून कोटा तोकिएर आएकाले समस्या उत्पन्न भएको भन्दै नगरपालिकाले कृषकहरूका लागि थप मल आपूर्तिको व्यवस्था मिलाउन माथिल्लो निकायहरूसँग निरन्तर पहल भइरहेको जनाएको छ ।
