तनहुँ । साउन २१
बन्दीपुर गाउँपालिका वडा नम्बर ३ अन्तर्गत पर्ने सेराटार–छिर्कने सडक खण्ड समयमै मर्मत नहुँदा स्थानीयवासीले सास्ती भोग्नु परेको छ । उक्त ग्रामिण सडकको दुरावस्थाका कारण स्थानीय सर्वसाधरण तथा विरामीहरु निकै सास्ती भोग्नु परेको छ । बुधबार स्थानीयहरुले शव (लास) लिएर दमौली डुम्रे तर्फ आउँदै गर्दा उक्त सडकमा यातयात सन्चालन हुन नसकेपछि मलामीहरुले धकेल्नुपरेको एक स्थानीयले बताए ।
वडा नम्बर ३ को रामकोट र तामुङ लगायतका बस्तीहरूमा बसोबास गर्ने सर्वसाधारणको ‘लाइफलाइन’ का रूपमा रहेको उक्त सडक खण्ड हिलाम्मे र खाल्डाखुल्डीका कारण पूर्ण रूपमा अस्तव्यस्त बनेको हो । ७ देखि ८ किलोमिटरको सो सडक पार गर्न सवारी साधन ५–६ ठाउँमा धकेल्नुपर्ने र करिब साढे ३ देखि ४ घण्टासम्म समय लाग्ने गरेको पीडित स्थानीयले बताएका छन् ।
केही समय अघि बन्दीपुर गाउँपालिकाका अध्यक्ष सुरेन्द्र थापा, वडा नम्बर ३ का वडाध्यक्ष परमेश्वर भट्टराई तथा प्राविधिकहरूको टोलीले सडकको प्रत्यक्ष निरीक्षण गरेको थियो । निरीक्षणपश्चात् अप्ठ्यारा ठाउँहरूमा ढुङ्गासहितको माटो (ग्राभेल) हाल्नका लागि लगत अनुमान तयार पारिएको थियो ।
तर, इष्टिमेट सम्पन्न भएको लामो समय बितिसक्दा पनि मर्मतको काम अगाडि नबढेपछि सर्वसाधारण निराश र आक्रोशित बनेका छन् । ‘अनुगमन र इष्टिमेटको काम कहाँ पुगेर रोकियो ? हामीले यस्तो सास्ती कहिलेसम्म भोग्नुपर्ने ?’ भन्दै स्थानीयले गाउँपालिका अध्यक्ष थापा र वडाध्यक्ष भट्टराईलाई प्रश्न गरेका छन् ।
दैनिक आवतजावत, कृषि उपजको बजारीकरण र आपत्कालीन स्वास्थ्य उपचारमा प्रत्यक्ष असर परिरहेको भन्दै स्थानीयले अविलम्ब सडक सुधारको काम सुरु गर्न गाउँपालिका र सरोकारवाला निकायसँँग माग गरेका छन् ।
