देवघाट । साउन २१
तनहुँको देवघाट गाउँपालिका–५ का तरकारी कृषक दिदीबहिनी धनमाया गुरुङ र रनमाया गुरुङले चितवनको नारयणगढ बजारमा भेटिएको नगद २२ हजार भन्दा बढिको पर्स सम्बन्धित व्यक्तिलाई बुझाएका छन् । ति दिदीबहिनीले तरकारी बेच्ने क्रममा भेटेको २२ हजार २५० रुपियाँ नगदसहितको पर्स वास्तविक धनीलाई सामाजिक अभियन्ता अर्जुन भुषाल मार्फत सुरक्षित रूपमा फिर्ता गरेका छन् ।
दैनिकजसो देवघाटबाट तरकारी बिक्रीका लागि नारायणगढ पुग्ने धनमाया र रनमायाले पुल्चोकस्थित एक फेन्सी पसल अगाडि तरकारी व्यापार गरिरहेका थिए । सोही क्रममा एक उपभोक्ताको पर्स झुक्किएर तरकारीको बोराभित्र परेको थियो । व्यापार सकेर घर पुगेपछि बोरा खोल्दा मात्रै उनीहरूले उक्त पर्स फेला पारेका थिए ।
पर्सभित्र २२ हजार २५० रुपियाँ नगदका साथै अन्य महत्वपूर्ण कागजातहरू रहेका थिए । कागजातका आधारमा उक्त पर्स नवलपरासीको गैँडाकोट नगरपालिका निवासी छलिमाया तिवारीको रहेको खुलेको थियो ।
आर्थिक रूपमा सामान्य अवस्था भए तापनि खेतीपाती र तरकारी बिक्री गरेर जीविकोपार्जन गर्दै आएका दिदीबहिनीले अरूको सम्पत्ति आफूले राख्नु उचित नहुने सोचका साथ सामाजिक अभियन्ता अर्जुन भुसालको सहयोगमा नारायणगढ पु¥याएर सम्बन्धित धनी छलिमाया तिवारीलाई पर्स बुझाएका छन् ।
लोभ नगरी ठूलो रकम र महत्वपूर्ण कागजात सुरक्षित रूपमा फिर्ता गर्ने धनमाया र रनमायाको यो कार्यको चौतर्फी प्रशंसा भइरहेको छ । आफ्नो महत्वपुर्ण कागजात सहितको पर्स भेटाएर बुझाएको भन्दै तिवारीले धनमाया गुरुङ र रनमाया गुरुङलाई सम्मान गरेकी छिन् । उनले सम्मान स्वरुप जनही ५ हजार रुपैयाँ दिएर धनमाया र रनमायालाई सम्मान गरेकी हुन् ।
