तनहुँ । साउन २१
राष्ट्रिय परिचयपत्र बनाउन जिल्ला प्रशासन कार्यालय तनहुँमा बिहानैदेखि लाग्ने सर्वसाधारणको अनियन्त्रित भिडलाई व्यवस्थित गर्न र साताका अन्तिम दिन शनिबार र आइतबार समेत सेवा सुचारु गर्न माग गर्दै राष्ट्रिय स्वतन्त्र पार्टी (रास्वपा) तनहुँले प्रमुख जिल्ला अधिकारी शिवलाल तिवारीको ध्यानाकर्षण गराएको छ ।
रास्वपा तनहुँका सभापति विश्व बास्तोलाको नेतृत्वमा गएको प्रतिनिधिमण्डलले बिहीबार प्रमुख जिल्ला अधिकारी तिवारीलाई भेटेर नागरिकले सास्ती भोग्नु परेको भन्दै ध्यानाकर्षण गराएको हो । उक्त भेटमा राष्ट्रिय परिचयपत्र बनाउन आउने सेवाग्राहीको भिड व्यवस्थापन गर्ने र शनिबार तथा आइतबारसमेत सेवा सुचारु गर्ने विषयलाई सहज रूपमा अगाडि बढाउने प्रजिअ तिवारीले प्रतिबद्धता जनाए ।
यस्तै रास्वपाका नेताहरुसँगको भेटमा भूमि आयोगसँग जोडिएका स्थानीयका गुनासा र समस्याहरू चाँडै समाधान गरिने जानकारी दिएका थिए भने बजारमा खाना पकाउने ग्यासको सहज आपूर्ति सुनिश्चित गर्न आवश्यक कदम चालिने र समस्या छिट्टै समाधान हुने प्रजिअ तिवारीले आश्वासन दिनुभएको रास्वपा व्यास नगर समितिका सभापती चुडामणी दाहालले जानकारी दिए ।
नागरिकका दैनिक समस्या र सेवा प्रवाहलाई छिटो–छरितो बनाउन प्रशासन गम्भीर हुनुपर्नेमा जोड दिँदै रास्वपा तनहुँले सहजीकरणका लागि आग्रह गरेको हो ।
