तनहुँ । भदौ २
भिमाद नगरपालिकाले अपाङ्गता भएका व्यक्तिहरूले निर्माण तथा उत्पादन गरेका सामग्रीहरूलाई प्राथमिकताका साथ खरिद गरी प्रयोग गरिदिन नगरबासी, सरोकारवाला व्यक्ति तथा संघसंस्थाहरूलाई अनुरोध गरेको छ ।
नगरपालिकाका प्रमुख प्रशासकीय अधिकृत शोभाखर पोखरेलले मंगलबार सूचना प्रकाशित गरि अपाङ्गता भएका व्यक्तिहरूको अधिकार प्रवद्र्धनका साथै उनीहरूका लागि रोजगारी र स्वरोजगारीका अवसरहरू सुनिश्चित गर्ने उद्देश्यले यो कदम चालिएको जनाएका छन् ।
भूमि व्यवस्था, सहकारी, सङ्घीय मामिला तथा सामान्य प्रशासन मन्त्रालय र महिला, बालबालिका, लैङ्गिक तथा यौनिक अल्पसंख्यक र सामाजिक सुरक्षा मन्त्रालयको मन्त्रीस्तरीय निर्णय र पत्रका आधारमा नगरपालिकाले सूचना जारी गर्दै अपाङ्गता भएका व्यक्तिहरूले उत्पादन गरेका सामग्री प्राथमिकताका साथ प्रयोग गर्न भिमाद नगरपालिकाले सर्वसाधरणमा अपिल गरेको हो ।
