तनहुँ । भदौ २
सवारी दुर्घटना न्यूनिकरण गर्ने उद्देश्यका साथ जिल्ला प्रहरी कार्यालय तनहुँले चलाएको सचेतना अभियान प्रभावकारी बनेको छ । तनहुँ जिल्ला प्रवेश गर्ने भारतीय सवारी साधनका चालकहरूलाई लक्षित गरी सञ्चालन गरिएको अभियानका कारण साउन महिनाभर भारतीय गाडीका कारण हुने दुर्घटना संख्या शून्यमा झरेको जिल्ला प्रहरी कार्यालयले जनाएको छ ।
असार महिनामा तनहुँमा भारतीय सवारी साधन दुर्घटनामा पर्दा ३ जनाको मृत्यु हुनुका साथै ४ जना घाइते भएका थिए । सो पश्चात् प्रहरीले साउन महिनाभर चालकहरूलाई सडकको अवस्था, गति नियन्त्रण तथा मौसमको अवस्था लगायतका विषयमा सचेत गराएको थियो । तर साउन महिनामा भने दुर्घटना संख्या शून्यमा झरेको जिल्ला प्रहरी कार्यालयले जनाएको छ ।
यसै अभियानलाई निरन्तरता दिँदै मंगलबार बिहान ६ बजेदेखि बेलुका ६ बजेसम्म विभिन्न स्थानमा सचेतनामूलक कार्यक्रमहरू सञ्चालन गरिएका छ । इलाका प्रहरी कार्यालय वेलचौतारामा ५० जना चालकलाई सचेतना प्रदान गरिएको छ भने इलाका प्रहरी कार्यालय आँबुखैरेनीमा ३३ जना चालकलाई सचेतना प्रदान गरिएको जनाईएको छ ।
यस नियमित प्रयास र सचेतना कार्यक्रमले जिल्लाभित्र हुने सवारी दुर्घटनामा उल्लेखनीय कमी आएको जिल्ला प्रहरी कार्यालय तनहुँले जनाएको छ ।
