तनहुँ । भदौ १८
बन्दीपुर गाउँपालिका–४, ठुलोढुङ्गामा मुग्लिनबाट दमौलीतर्फ आउँदै गरेको ट्याक्सीलाई जाँच गर्ने क्रममा प्रहरीले १७ किलो १०५ ग्राम गाँजासहित चार जनालाई नियन्त्रणमा लिएको छ ।
पक्राउ पर्नेहरूमा नवलपरासी (सुस्ता पूर्व) विनयी त्रिवेणी–१ का २७ वर्षीय पुरुष, काभ्रेपलाञ्चोक बनेपा–१ का ३२ वर्षीय पुरुष, कास्की पोखरा–२७ वागमाराका २३ र ३२ वर्षका दुई पुरुष रहेका छन् ।
प्रहरी चौकी डुम्रेको टोलीले पक्राउ गरेका उनीहरूमाथि तनहुँ जिल्ला अदालतबाट म्याद थप गरी थप अनुसन्धान अघि बढाइएको जिल्ला प्रहरी कार्यालय तनहुँका सूचना अधिकारी प्रहरी नायव उपरीक्षक द्वारिकाप्रसाद घिमिरेले जानकारी दिए ।
