१७ भदौ, दमौली
मंगलबार दिउँसो पृथ्विराजमार्गमा यात्रा गर्ने अधिकांश सवारी चालकहरु घाँसिकुवामा आईपुग्दा ट्राफिक प्रहरीको नमस्ते पाउँदा केही समय अचम्मित बने । नमस्तेसँगै ट्राफिक प्रहरीले सवारी र चालकको कागजपत्र मागेका थिए । यस अघि ट्राफिक प्रहरीको रुखो स्वभावको अनुभव गर्दै आएका सवारी चालकहरु नमस्ते पाउँदा व्यङ्ग्य गरेको पनि भन्नेठानेर अचम्मित बने, केहीले नमस्ते फर्काए भने केहीले हासेरै बसे ।

ट्राफिक प्रहरीले मंगलबारदेखी चालकलाई नमस्ते गर्ने अभियान सुरु गरेको छ । ट्राफिक प्रहरीको आचरण र व्यवस्थापन सम्बन्धी नयाँ निर्देशिका अनुसार अवदेखी ट्राफिक प्रहरीले सवारी चालकसँग आदर र सम्मान गर्नु पर्छ । गन्डकी प्रदेश ट्राफिक प्रहरी कार्यालय पोखराको निर्देशन अनुसार मंगलबारदेखी जिल्ला ट्राफिक प्रहरी कार्यालय तनहँुले राजमार्गमा सवारी चेकजाँचको क्रममा नयाँ नीति अवलम्बन गरेको हो ।

साना÷ठुला जुनसुकै सवारी चालकलाई सबैभन्दा पहिला ट्राफिक प्रहरीले हाँसेर नमस्तेको अभिवादन गर्नु पर्नेछ । त्यसपछि सन्चो विसन्चो सोधी, यात्राको गन्तब्यको बारेमा सोधपुछ गरि आवश्यक कागजपत्र माग्नु पर्ने जिल्ला ट्राफिक प्रहरी कार्यालय तनहँुका प्रमुख रेशम रानाभाटले बताए । कागजपत्र सही नभएको सवारी र चालकसँग नियमानुसारको जरिवाना पनि हासेर नै अशुल गर्नु पर्ने छ । र अन्त्यमा चालक र यात्रुहरुको यात्राको सफलताको शुभकामना पनि दिईने रानाभाटले बताए ।

मंगलबार घाँसिकुवाको सडकमा भेटिएका सबै चालकले ट्राफिक प्रहरीबाट यस्तै व्यवहार पाएका थिए । ट्राफिक प्रहरीलाई हेर्ने दृष्टिकोण अव बदलिनु आवश्यक रहेको भन्दै रानाभाटले यस्तो आदरको व्यवहार नभएको पाईए कार्यालयमा गुनासो गर्न समेत अनुरोध गरे । ट्राफिक प्रहरी जनताको जिउ धनको सुरक्षाकोलागि सडकमा खटिने एक राष्ट्रसेवक भएको हुँदा अव जतनासँग गरिने व्यवहार सुधार हुने रानाभाटले बताए ।

विगतमा ट्रफिक प्रहरीबाट नमिठो व्यवहारको अनुभव गरेका सवारी चालक विकास ठकुरीले मंगलबारको ट्राफिकको व्यवहारले निकै खुसी लागेको बताए । यस्तो आदर र सम्मानको व्यवहार सँधै हुने हो भने यात्रा पनि सुखद र सुरक्षित हुने विकासको भनाई छ ।