३ कार्तिक, दमौली
प्रतिनिधि सभा तनहूँ क्षेत्र नम्बर १ का सांसद कृष्णकुमार श्रेष्ठ किसानले संसद सचिवालयले दशै खर्च स्वरुप उपलब्ध गराएको रकम जिल्लाका चार जना मृगौला पीडित व्यक्तिहरुको उपचारकोलागि उपलब्ध गराउने भएका छन् ।
सांसद श्रेष्ठले सोमबार प्रेस विज्ञप्ति जारी गरि दशै खर्च स्वरुप प्राप्त भएको ६४ हजार रुपैयाँ मृगौला पीडितहरु व्यास नपा १ का अमृतबहादुर खत्री व्यास नपा १४ का सन्तोष राना, व्यास नपा १२ का अनुप क्षेत्री र व्यास नपा ४ का अब्दुल गफ्फारलाई उपलब्ध गराउने घोषणा गरेका हुन् ।
यस मध्ये व्यास १ का अमृतबहादुर खत्रीलाई सोमबार नै सांसद श्रेष्ठले रकम उपलब्ध गराईसकेका छन् भने बाँकी तिन जनालाई मंगलबार उपलब्ध गराउने सांसद श्रेष्ठका स्वकीय सचिव जगत खड्काले बताए ।
अहिले विश्वव्यापी महामारीको रुपमा फैलिएको कोभिड–१९ को कारण नागरिकहरु अक्रान्त बनेका छन् । देश विषम परिस्थिती र नागरिकहरु आर्थिक कठिनाईमा परेको बेला समस्याग्रस्त नागरिकलाई सहयोग गर्नु सबैको जिम्मेबारी भएको सांसद श्रेष्ठले बताएका छन् ।
सांसद श्रेष्ठले सांसदको रुपमा निर्वाचित भएर सपथ ग्रहण गरेपश्चात अहिलेसम्मको सबै महिनाको पारिश्रामिक तनहूँजिल्लाका विभिन्न संघ संस्था र समुदायलाई क्रमशः उपलब्ध गराएका छन् ।
