२१ मंसिर, बन्दिपुर
बन्दिपुर गाउँपालिकाको आयोजनामा वडा नम्बर ४ का उपभोक्ता समितिका पदाधिकारीलाई योजना कार्यान्वयन सम्बन्धि अभिमुखीकरण कार्यक्रम सोमबार आयोजना गरियो । सो कार्यक्रममा वडा नम्बर ४ भित्र सम्पन्न गरिने योजनाका उपभोक्ता समितिका पदाधिकारीलाई योजना कार्यान्वयन सम्बन्धि अभिमुखीकरण गरि चालु आर्थिक वर्ष भित्र सम्पन्न गर्ने योजनाहरुको सम्झौता समेत गरिएको थियो ।
सो कार्यक्रममा गाउँपालिकाका अध्यक्ष पुर्णसिंह थापाले योजनाहरुलाई प्रभावकारी रुपमा कार्यान्वयन गर्नुपर्नेमा जोड दिए । बन्दिपुर मुलुककै प्रमुख पर्यटकीय गन्तव्य भएको हुँदा गाउँपालिकाले सम्पन्न गर्ने योजनाहरु पनि पर्यटक मैत्री हुनु पर्ने बताए ।
गाउँपालिकाबाट सञ्चालित हुने योजनाहरुलाई प्रभावकारी बनाउने सम्बन्धि सुझाव दिन र उपभोक्तालाई सहजता दिने उद्देश्यले वडा स्तरमै अभिभुखीकरण गरि सम्झौता गरिएको प्रमुख प्रशासकीय अधिकृत महेश सुवेदीले बताए । गाउँपालिकाले अन्य वडामा पनि अभिमुखीकरण गर्ने छ ।
वडा नम्बर ४ का उपभोक्ता समितिका पदाधिकारीहरुलाई समयमै योजनाको सम्झौता गरी समयमै गुणस्तरीय काम सम्पन्न गर्न अनुरोध गरिएको थियो । सो कार्यक्रममा गाउँपालिकाकी उपाध्यक्ष करुणा गुरुङ, प्रमुख प्रशासकीय अधिकृत महेश सुवेदी लागयतले मन्तव्य राखेका थिए । चालु आर्थिक वर्षमा वडा नम्बर ४ मा २७ वटा योजनाहरु छनौट गरिएको छ । त्यस मध्ये अधिकांशको सोमबार सम्झौता गरिएको प्रमुख प्रशासकीय अधिकृत सुवेदीले जानकारी दिए ।
