दमौली, बैशाख १०
आइतबार भएको उपनिर्वाचना तनहुँ क्षेत्र नम्बर १ मा ५३ प्रतिशत मात्रै मत खसेको छ । यद्यपी उपनिर्वाचन भएका अन्य दुई क्षेत्रमा ६३ प्रतिशत भन्दा बढि मत खसेको छ । चितवन २ मा ६३ प्रतिशत र बारा २ मा ६४ प्रतिशत मत खसेको छ । तर राजनीतिमा रुपमा धेरै सचेत मानिने तनहुँमा भने ५३ प्रतिशत मात्रै मत खसेको छ ।
गत मंसिरमा सम्पन्न आम निर्वाचनमा तनहुँ १ मा ५४ दशमलब ०३ प्रतिशत मत खसेको थियो । यसपटक मंसिरको भन्दा १ प्रतिशत कम खसेको छ । तनहुँमा १२३३०५ मतदाता थिए ।
मत कम खस्नुमा विभिन्न खाले अनुमान पनि गरिएका छन् । केहीले राजनीति प्रति आम मतदातामा निराशा र बितृष्णा कम भएको कारणले कम मत खसेको विश्लेषण गरेका छन् । त्यसैगरि अन्य २ निर्वाचन क्षेत्रमा भन्दा तनहुँमा निर्वाचन बहिष्कारबादीहरुको प्रभाव बढि भएको कारण पनि यो क्षेत्रमा कम मतदान हुनुको अर्काे कारण मानिन्छ ।
त्यसैगरि तनहुँको क्षेत्र नम्बर १ मा उपनिर्वाचन भएपनि अर्काे निर्वाचन क्षेत्रमा भने सरकारी कार्यालयहरु सन्चालन भएका थिए । साथै तनहुँका अधिकांश मतदाता काठमाडौंमा विभिन्न पेशा र व्यवसाय गरेर बसेका छन् । त्यहाँ बिदा नभएको कारण पनि धेरै मतदाताहरु मतदान गर्न नआएको कारणले पनि यसपटक मतदान कम भएको अनुमान गरिएको छ ।
