दमौली, असार २४
देवघाटमा निर्माणाधिन देवघाट सार्वजनिक पुस्तकालयको भवन निर्माणको लागि देवघाटमा रहेका सामुदायिक वन उपभोक्ता समूहहरूले सहयोग गरेका छन् ।
पुस्तकालयको भवन निर्माण प्रयोजनका लागि देवघाट गाउँपालिका–५ मा रहेको पाँच वटा सामुदायिक वनहरुले सालको काठ उपलव्ध गराएका छन् । पुस्तकालका अध्यक्ष शिवराज पौडेलका अनुसार साँढेबगर सामुदायिक बन उपभोक्ता समूहबाट २५ क्यूफिट काठ, चक्रवर्ती सामुदायिक बन उपभोक्ता समूहबाट ३ क्यूफिट काठ उपभोक्ता मुल्यमा र १ क्यूफिट काठ निशुल्क, सीता सामुदायिक बन उपभोक्ता समूहबाट २० क्यूफिट काठ उपभोक्ता मुल्यमा, मधुवन सामुदायिक बन उपभोक्ता समूहबाट ९ क्यूफिट काठ उपभोक्ता मुल्यमा र १० थान चौकोस निशुल्क तथा रानीबन सामुदायिक बन उपभोक्ता समूहबाट १० थान चौकोस निशुल्क प्राप्त भएको छ ।
त्यस्तै कालिका र देउती सामुदायिक बन उपभोक्ता समूहहरूले आफ्नो मौज्दात र पुस्तकालयको आवश्यकताको आधारमा काठ उपलव्ध गराउने प्रतिवद्धता व्यक्त गरेको पौडेलले जानकारी दिए ।
अध्यक्ष पौडेलले पुस्तकालय भवन निर्माणकोलागि हालसम्म सहयोग गर्ने सबैलाई धन्यवाद दिई अन्य व्यक्ति तथा संघ सस्थालाई पनि भवन निर्माणमा सघाउन अपिल गरिएको बताए ।
उक्त भवनको विस्तृत परियोजना प्रतिवेदन अनुसार कूल लागत ३ करोड ६८ लाख रुपैयाँ रहेको अध्यक्ष पौडेलले जानकारी दिए । पौडेलका अनुसार १० हजार भन्दा बढी आर्थिक सहयोग गर्ने दाताहरुको नाम शिलालेखमा उल्लेख गरिने छ । हाल देवघाट सार्वजनिक पुस्तकालयको दैनिक कार्य नेपाल रेडक्रस सोसाइटी उपशाखा देवघाटबाट भईरहेको छ ।
