दमौली, साउन १४
पृथ्वीराजमार्ग विस्तारका लागि मुआब्जा लिईसकेका तनहुँको बन्दीपुर गाउँपालिका–१ स्थित डुम्रे बजारका घरधनीले अझै पनि घर टहरा भत्काउन अटेर गरिरहेका छन् । सडक योजनाको रेखाङ्कन भित्र परेका संरचना हटाउने प्रयोजनकोलागि पहिलो किस्ता मुआब्जा रकम प्राप्त गरिसकेका डुम्रेका घर धनीले अझैपनि घर टहरा भत्काउन अटेर गरेका हुन् ।
मुआब्जा लिईसकेका केही व्यक्तिले सडक योजनाको रेखाङ्कन भित्र परेका संरचना हटाउन आलटाल गरेपछि मुग्लिन पोखरा सडक योजना (पूर्वी खण्ड) उक्त घर टहरा हटाउन ताकेता गर्न बन्दिपुर गाउँपालिका वडा नम्बर १ को कार्यालयलाई अनुरोध गरेको छ । मुग्लिन पोखरा सडक योजना (पूर्वी खण्ड) का योजना प्रमुख नरेन्द्र सुवेदीले वडा नम्बर १ लाई पत्र लेख्दै सडक योजनाको रेखाङ्कन भित्र परेका संरचना हटाउन ताकेता गर्नु हुन अनुरोध गरेका छन् ।
योजनाको रेखाङ्कन भित्र परेका केही घरधनीले अझै सम्म पनि मुआब्जाकोलागि निबेदन समेत नदिएको हुँदा १५ दिन भित्र मुआब्जाकोलागि निबेदन दिनु हुन र मुआब्जा प्राप्त गरेका घरधनीले पनि १५ दिन भित्रमा घर टहरा हटाउन आयोजनाले अनुरोध गरेको छ । अन्यथा प्रचलित ऐन कानुन अनुसारको प्रक्रिया आरम्भ गर्ने सुवेदीले बताए ।
