दमौली, भदौ १
गन्डकी प्रदेशको गौरबको आयोजनाको रुपमा रहेको तनहुँको दमौली र चितवनको घुमाउने जोड्ने बुद्धसिंह मार्गको बन्दिपुर गाउँपालिका–६ आँपखोलामा गत साउन २६ गते राती गएको पहिरोको हटाईएको छ । बन्दिपुर गाउँपालिकाले शुक्रबार डोजर पठाएर उक्त पहिरो हटाएको हो । पहिरो खस्दा त्यस यता उक्त सडकमा यातयात बिच्छेद भएको थियो ।
पहिरो खसेर यातयात बन्द भएको बारेमा त्यस क्षेत्रका अगुवा हर्कबहादुर थापा सहितका बासिन्दाहरुले बन्दिपुर गाउँपालिकाका अध्यक्ष सुरेन्द्र थापालाई जानकारी गराएपछि गाउँपालिका अध्यक्ष थापाले वडा नम्बर ६ का अध्यक्ष बलबहादुर गुरुङसँग समन्वय गरेर उक्त पहिरो हटाउन डोजर पाएका थिए । यसबारेमा देवघाट अनलाइनमा समाचार प्रकाशित भएपछि मात्र उक्त सडकको पहिरोको बारेमा आफुले जानकारी पाएको अध्यक्ष थापाले बताए । सडकको पहिरो पन्छाएपछि यातयात सुचारु भएको अध्यक्ष थापाले बताए । पहिरोको बारेमा बेलैमा जानकारी नपाउँदा नागरिकहरुले दुख पाउनु परेको अध्यक्ष थापाले बताए ।
गन्डकी प्रदेशलाई चितवन र तराईका अन्य जिल्लासँग जोड्ने सबैभन्दा छोटो दुरीको बैकल्पिक सडकको रुपमा उक्त सडकलाई लिने गरिएको छ । गन्डकी प्रदेश सरकारले उक्त सडकको दमौलीदेखी व्यास नपा–१३ को सोँढेसम्म १० कि.मि. कालोपत्रेको काम गरिरहेको छ ।
उक्त बुद्धसिंह मार्गलाई मुग्लिन–नारयणगढ सडकसँग जोड्ने चितवनको घुमाउनेमा पक्कीपुल निर्माणाधिन अवस्थामा छ । सो पुलको निर्माण सम्पन्न पश्चात बाटो छोटिन्छ । पुल निर्माणपछि सो सडक हुँदै यात्रा गर्दा हाल सन्चालनमा रहेको पृथ्वीराजमार्गको मुग्लिन हुँदै नारयणगढ जानुभन्दा करिब २६ किलोमिटर छोटो पर्छ ।
उक्त सडक गन्डकी प्रदेश मातहत रहेपनि पुर्वाधार विकास कार्यालयले सडकको पहिरो पन्छाउने जिम्मेबारी आफ्नो कार्यालयको नभएको भन्दै जिम्मेबारीबाट पन्छिएका थिए । प्रदेश सरकारले अहिले १० किमि सडक कालोपत्रे गरिरहेको हुँदा त्यही १० कि.मि. भित्र हुने अवरोध हटाउने जिम्मेबारी मात्र कार्यालयको रहेको र बाँकीमा कार्यालयको कुनै भुमिका नहुने घिमिरेले बताएका थिए ।
