दमौली, भदौ १९
नारीहरुको महान चाड हरितालिका तिजको अवसरमा म्याग्दे गाउँपालिकाले महिला समुहरुको विचमा गाउँपालिका स्तरिय तिज गित प्रतियोगिता गर्ने भएको छ । ‘म्याग्दे गाउँपालिका अभियान रैथाने बाली संरक्षण’ शिर्षकमा भदौ २६ गते मंगलबार गाउँपालिका स्तरिय महिला समुहरुको तिज गित प्रतियोगिता गरिने गाउँपालिकाका प्रमुख प्रशासकीय अधिकृत जितबहादुर रानाले बताए ।
उक्त प्रतियोगिताका प्रथम, द्वित्तिय, तृतिय तथा स्वान्त्वना हुने टिमलाई क्रमशः १२ हजार, १० हजार, ७ हजार र ३५ सय नगद पुरस्कार तथा प्रमाणपत्र प्रदान गरिने छ । साथै सहभागी हुने सबै टिमलाई यातयात खर्च वापत १ हजार उपलब्ध गराईने रानाले जानकराी दिए ।
प्रतियोगितामा सहभागी हुनको लागि भदौ २५ गते साँझ ५.०० बजेसम्म फोनबाट समुह दर्ता गराउनु पर्ने हुन्छ । प्रतियोगितामा एक समुहमा नृत्य कलाकार सहित बढिमा सात देखी दश जना सहभागी संख्या हुनुपर्नेछ, त्यस्तै बाद्यबादनको व्यवस्था गाउँपालिकाले उपलब्ध गराउने भएको छ ।
नेपाली मौलिक संस्कृति झल्काउने पोशाक लगाउने समुहलाई विशेष ग्राह्यता दिइने गाउँपालिकाले जनाएको छ । साथै कुनै व्यक्ति, धर्म, सम्प्रदाय, राजनीतिक दल विशेषलाई व्यक्तिगत आक्षेप लगाउन पाइनेछैन भने एक महिला समुहबाट एक समुहको प्रस्तुतीलाई मात्र मान्यता दिइनेछ । एक व्यक्ति अर्काे समुहको प्रस्तुतीमा आवद्ध हुन पाइनेछैन ।
