काठमाडौं, मंसिर १९
संवृद्धिका लागि संकल्प यात्राको क्रममा नेकपा एमालेका अध्यक्ष केपी शर्मा ओलीसहितको टोलीलाई जाजरकोट र रुकुमको सीमा क्षेत्रमा नेकपा माओवादी केन्द्रका उपमहासचिव जनार्दन शर्माले स्वागत गरेका छन् ।
मंगलबार सुर्खेतबाट भूकम्प प्रभावित जाजरकोट र रुकुम पश्चिमतर्फ गएको टोलीलाई रिम्ना भन्ने ठाउँमा उपमहासचिव शर्माले स्वागत गरेका हुन् । अध्यक्ष ओलीको नेतृत्वको टोलीलाई स्वागत गर्दै उपमहासचिव शर्माले भूकम्प प्रभावित क्षेत्रको पछिल्लो अवस्थाबारे जानकारी समेत गराएका थिए ।
उपमहासचिव शर्माले एमालेको शीर्ष नेतृत्व नै संकल्प यात्राका क्रममा सो क्षेत्रमा आएकोमा अध्यक्ष ओलीलाई धन्यवाद दिएका थिए । रिम्ना जाजरकोट र रुकुम पश्चिमको सिमानामा पर्छ।
नेता शर्मा एमालेले बनाएको स्वागत गेटमै पुगेर स्वागत गरे । शर्मा भूकम्पपछि गृहजिल्लामै छन् । एमाले अध्यक्ष ओलीले दुवै जिल्लाका भूकम्प प्रभावितहरुको अवस्थाको बारेमा जानकारी लिएका थिए ।
