बन्दिपुर, चैत २६
असल छिमेकी नेपाल पोखराले बन्दीपुरका युवाहरूलाई सीपमूलक तालिम दिएको छ । युवा लक्षित शिप विकास तथा क्षमता अभिवृद्धि परियोजना अन्तर्गत बन्दीपुर गाउँपालिकाका ४० जना युवाहरूलाई कुकिङ र इलेक्ट्रिसियन हाउस वायरिङ तालिम प्रदान गरेको बन्दीपुर गाउँपालिका अध्यक्ष सुरेन्द्र बहादुर थापाले बताए ।
विभिन्न स्थानीय तहहरूसँग समन्वय गरी बन्दीपुर लगायत विभिन्न ठाउँमा युवा लक्षित विकास र क्षमता अभिवृद्धि कार्यक्रम सञ्चालन गरेको असल छिमेकी नेपालका मोनिटरिङ सुपरभाइजर नवराज मजकोटीले जानकारी दिए । बन्दीपुर गाउँपालिकाका २० जनालाई कमर्सियल कुकिङ र २० जनालाई इलेक्ट्रिसियन हाउस वायरिङ तालिम प्रदान गरेको छ । यही चैत्र २ गतेदेखि बन्दीपुर गाउँपालिका वडा नम्बर १ एक स्थित बन्दीपुर फार्म हाउसमा कमर्सियल कुकिङ तालिम प्रदान गरेको छ ।
यस्तै बाँकी २० जनालाई इलेक्ट्रिसियन हाउस वायरिङको तालिम पोखराको सृजनाचोक स्थित एसियन टेक्निकल इन्स्टिच्युटमा भइरहेको छ । शनिबार गाउँपालिका अध्यक्ष थापाले तालिमको अवलोकन गर्दै तालिम लिने युवाहरूलाई तालिमको सदुपयोग गरी स्वरोजगार बन्न आग्रह गरेका छन् । तालिम अन्तर्गत चैत्र ३ गतेदेखि वैशाख ४ गतेसम्म र त्यसपश्चात् १९ गतेसम्म ओजिटि सञ्चालन हुनेछ ।
ओजिटि पश्चात् बिजनेस डेभलपमेन्ट ट्रेनिङ सञ्चालन हुने मोनिटरिङ सुपरभाइजर माजकोटीले बताए । असल छिमेकी नेपाल पोखराले तालिम लिएका ४० जनामध्ये स्वरोजगार बन्न चाहने ३ जनालाई व्यवसाय सञ्चालन गर्न करिब ५० हजार प्रोत्साहन स्वरूप अनुदान प्रदान गरिने बताएको छ ।
