दमौली, चैत २५
नेपाली काँग्रेसका केन्द्रीय सदस्य गोविन्द भट्टराईले आफुले चुनाव हारेपनि जनताको विकासको काममा कहिलेपनि पछि नहट्ने बताएका छन् । व्यास नपा–१३ स्थित कुकुरढुङ्गे छापडाडा कृषक महिला समूहको भवन शिलान्यास कार्यक्रमलाई सम्बोधन गर्दै केन्द्रीय सदस्य भट्टराईले चुनाव हारेपनि जनताको बिकासमा हात पछि नसार्ने र बिकासको काममा सदैव अग्रपङतिमा रहि काम गर्ने बताए । उनले चुनाब जित्नेहरु चुनाबपछि नफर्किएको हुँदा जनताले आगामी दिनमा राम्रो मुल्याङकन गर्ने बिचार व्यक्त गरे ।
उक्त कृषि भवन निर्माणकोलागि केन्द्रीय सदस्य भट्टराईको पहलमा संघीय सरकारबाट तिस लाख रुपैया बजेट बिनियोजित भएको थियो । उपनिर्वाचनको बेला चुनाव प्रचारको क्रममा आउदा माग गरिएको बजेटलाई चुनाब हारेपनि पुरा गरेको भट्टराईले बताए ।
सो कार्यक्रममा नेपाली काङग्रेस महाधिवेशन प्रतिनिधि रेशम गुरुङ्ग, सुरेश भट्टराई, नेपाली काङग्रेस क्षेत्र नम्बर १ का सभापति श्याम मौराती, नेपाली काङग्रेस जिल्ला कार्यसमिति सदस्य सिर्जना तिवारी, नेपाली काँग्रेस व्यास १३ सभापति रेसम बिक लगायतले मन्तव्य राखेका थिए ।
