दमौली, चैत २६
होटल व्यवसायी संघ तनहुँले चैत ३० गते दमौलीमा नयाँ बर्ष सांगीतिक साँझ गर्ने भएको छ । संघले सोमबार पत्रकार सम्मेलन गर्दै नयाँ बर्ष सांगीतिक साँझ २०८० गर्ने जानकारी गराएको हो ।
संस्थाले बिगतका बर्षमा जस्तै यसबर्ष पनि नयाँ बर्षको अवसरमा सांगीतिक साँझ आयोजना गर्न लागेको होटल व्यवसायी संघ तनहुँका निवर्तमान अध्यक्ष एवं संघको गण्डकी प्रदेशका वरिष्ठ उपाध्यक्ष दुर्गा बिलास भट्टराईले बताए । यहाँका युवायुवती नयाँ बर्ष मनाउन पोखरा काठमाडौ जस्ता शहरमा जाने गरेका छन् । ती युवायुवतीलाई यहीँ नै रोकेर मनोरञ्जन दिलाउने उदेश्यले साँगितिक कार्यक्रम गर्न लागेका हौ । ‘यहाँका युवयुवतीलाई थोरै पैसामा पनि रमाउन सकिने बाताबरण मिलाउने लक्ष्यका साथ कार्यक्रम गरिन लागिएको हो’, उनले भने । सांगीतिक साँझमा राष्ट्रिय कलाकार दुर्गेश थापाको प्रस्तुति रहनेछ ।
त्यस्तै गरि स्थानीय कलाकारको पनि प्रस्तुति रहने आयोजकले जनाएको छ । उनीहरुले दर्शक दिर्घालाई भरपुर मनोरञ्जन दिने बिश्वास गरिएको छ ।
कन्सर्टमा खर्च बढी हुने गरेकाले अहिले सांगीतिक साँझ गरिन लागिएको उपाध्यक्ष भट्टराईले बताए । सांगीतिक साँझको लागि पर्यटन बोर्ड गण्डकी प्रदेशले ६० हजार दिने प्रतिबद्धता जनाएको पत्रकार सम्मेलनमा जानकारी गराइएको थियो । कार्यक्रमको लागि प्रवेश शुल्क दुई सय रुपैयाँ तोकिएको संघका अध्यक्ष गिर बहादुर थापाले बताए ।
सो कार्यक्रममा होटल व्यवसायी संघ तनहुँले प्रकाशित गरेको २०८१ सालको भित्तेपात्रोको संघका केन्द्रीय सदस्य प्रेमकुमार श्रेष्ठले विमोचन गरे ।
