दमौली, चैत २९
गन्डकी प्रदेशका मन्त्री हरिबहादुर चुमानले योगलाई मानिसको दैनिक जिवन र व्यवहारमा उतार्नु पर्ने बताएका छन् । जिल्ला आयुर्वेद स्वास्थ्य केन्द्र तनहुँको आयोजनामा विहिबार भएको सगठित योग कार्यक्रमलाई सम्बोधन गर्दै मन्त्री चुमानले मानव जिवनमा योगको महत्वपुर्ण भुमिका रहेको हुँदा योगलाई व्यवहारमा उतार्नु पर्ने बताएका छन् ।
हिजो आजको दैनिक काम र खानपिनले मानसिक तनाव र स्वास्थ्यमा प्रभाव पार्ने हुँदा त्यसबाट मुक्ती पाउन पनि दैनिक रुपमा योग गर्ने बानी बसाल्नुपर्ने मन्त्री चुमानको भनाई थियो । योगको उत्पती नेपालबाट नै भएको हुँदा नेपालमा झन योगको अति महत्व भएको उनको भनाई थियो ।
प्रमुख जिल्ला अधिकारी जनार्दन गौतमले कार्यालयको कामको क्रममा तनाव उत्पन्न भएमा केही समय छुट्याएर योग गर्न सकिने बताए । योग गरेमा मानसिक तनाव मात्र नभई अन्य स्वास्थ्य समस्याबाट पनि छुटकारा पाउन सकिने प्रजिअ गौतमको भनाई थियो ।
जिल्ला आयुर्वेद स्वास्थ्य केन्द्र तनहुँका प्रमुख डा.नारयण श्रेष्ठले सरकारी कार्यालयका कर्मचारीहरुले कार्यालयको काममा हुने तनावबाट मुक्ती पाउन संगठित रुपमा योग गर्न सकिने बताए । जिल्ला आयुर्वेद स्वास्थ्य केन्द्रले सरकारी कार्यालयका प्रमुखहरुलाई कर्पाेरेट योगको बारेमा जानकारी दिने उद्देश्यले उक्त कार्यक्रम आयोजना गरिएको बताए । कार्यालयमा समुहगत रुपमा गरिने योगलाई कर्पाेरेट योग भनिने डा. श्रेष्ठले बताए । सो कार्यक्रमको सन्चालन केन्द्रका बरिष्ठ कविराज शम्भु चापागाईंले गरेका थिए ।
सो संगठित योग कार्यक्रममा तनहुँ जिल्लाका विभिन्न सरकारी कार्यालयका प्रमुखहरु तथा सुरक्षा निकायका प्रमुख गरि ३० जनाको सहभागिता रहेको थियो ।
