देवघाट, बैशाख ८
नेपाली कांग्रेसका केन्द्रीय सदस्य गोविन्द भट्टराईले चुनाव हारे पनि आफूले चुनावमा बोलेका बाचा पूरा गर्ने अभियानमा आफू सक्रिय रहेको बताएका छन् । देवघाट गाउँपालिका–१ कोटामा श्रीजनशील युवा क्लबद्वारा आयोजित भलिबल प्रतियोगिताका विजेतालाई पुरस्कार वितरण गर्दै उनले भने, ‘मैले पानी ल्याइदिन्छु भनेको थिएँ । अहिलेको बजेटमा खानेपानीको योजनामा वृहत कोटा १८ लाख विनियोजन गराइदिएको छु । चाहिने अरु पैसा दिलाउने बाचा गर्न चाहन्छु ।’
आफू हरेक दिदी बहिनीको भान्सामा पानी पुग्नुपर्छ भनेर लागेको भन्दै उनले आफ्नो सक्रियतामा तनहुँका ५९ खानेपानी योजना बनेको उल्लेख गरे । ‘चुनाव हारे पनि तनहुँमा २० ओटा खानेपानीका नयाँ योजना पार्न पहल गरेको छु,’ देवघाटमासमेत त्यस्ता योजनाहरु परेको उल्लेख गर्दै उनले भने ‘५८ करोडको शालिग्राम करिडोरको ठेक्का पनि हाम्रै पहलमा लागेको छ ।’
देवघाटमा अरु विकासका योजना ल्याउनसमेत प्रयास गरिरहेको बताएका भट्टराईले भने,‘म यस ठाउँलाई दक्षिण भेगको विकासको केन्द्र बनाउन चाहन्छु ।’ आफूलाई काम गर्न पद र सरकार नचाहिने तर्क गर्दै उनले भने,‘म यही ठाउँको हो । मलाई काम गर्न हाम्रो सरकार पनि चाहिन्न । तर, गोरु बेचेकै साइनो छैन भन्ने जितेका व्यक्ति कता हिँड्नुभएको छ ?’
तनहुँ क्षेत्र नम्बर १ बाट निर्वाचित सांसद स्वर्णिम वाग्लेप्रति लक्षित गर्दै उनले थपे, ‘उहाँलाई यहाँको विकासको चासो पनि छैन । उहाँहरुको चासो साना ठेलागाडा चलाउने, दुध बेचेर संकलन गरेको पैसा ६ सहकारीबाट ३ खर्ब हिनामिना गरेका ठग्ने मान्छेको संरक्षणमा छ ।’
