देवघाट, असार २
गत बैशाख १५ गते राती चट्याङ परि घरबार विहिन भएका देवघाट गाउँपालिका–४ का रातेपानीका शुकबहादुर भुजेललाई देवघाट गाउँपालिका अन्तर्गतका सामुदायिक विद्यालयका शिक्षकहरुले आर्थिक सहयोग गरेका छन् ।
नेपाल शिक्षक महासंघ देवघाट गाउँ कार्य समिति मार्फत देवघाट गाउँपालिका अन्तर्गतका सामुदायिक विद्यालयमा कार्यरत शिक्षकहरुले संकलन गरेको १५ हजार रुपैयाँ आइतबार शुकबहादुरलाई हस्तान्तरण गरियो ।
देवघाट गाउँपालिका अध्यक्ष तिलबहादुर थापा, शिक्षक महासंघ देवघाटका अध्यक्ष बैकुण्ठ भट्टराई लगायत शिक्षकहरुले सो रकम पीडित शुकबहादुरलाई हस्तान्तरण गरेका थिए । चट्याङले शुकबहादुरको घर पुर्णरुपमा जलेको थियो । उनीहरु छिमेकीको घरमा बस्दै आएका छन् ।
