दमौली, असार २२
तनहुँमा लागु औषध सहित दुई जना पक्राउ परेका छन् । पक्राउ पर्नेमा ललितपुर गोदावरी नगरपालिका–१४ का २४ बर्षिय रोमन मगर र सर्लाही इश्वरपुर नगरपालिका–२ बस्ने बर्ष २६ को बिशाल बिसुन्खे रहेका छन् ।
विहिबार साँझ म्याग्दे गाउँपालिका–२ जामुने स्थित पृथ्वी राजमार्ग सडक खण्डमा चेकिङमा खटिएका प्रहरीले दमौलीदेखी पोखरा तर्फ जादै गरेको बा ५९ प ८०२९ नम्बरको मोटरसाइकललाई रोकी चेकजाँच गर्ने क्रममा मोटरसाइकल पछाडी सवार रोमन मगरले शरिरमा लुकाई राखेको लागु औषध ट्रामाडोल लेखेको २१० क्याप्सुल फेला परेको हुँदा उक्त लागु औषध बरामद गरी मगर र बिसुन्खेलाई पक्राउ गरि शुक्रबार तनहुँ जिल्ला अदालतमा पेश गरि म्याद थप गरी थप अनुसन्धान भईरहेको प्रहरीले जनाएको छ ।
जुवा खेल्दै गरेका पाँच जना महिला पक्राउ
यसैगरि व्यास नपा–१२ छिर्कनमा जुवा (तास) खेल्दै गरेको अवस्थामा पाँच जना पक्राउ परेका छन् । शुक्रबार साँझ ब्यास नपा–१२ छिर्कन स्थित घरमा अबैध रुपमा जुवा तास खेली रहेको भन्ने गोप्य सुचनाको आधारमा जिल्ला प्रहरी कार्यालयबाट खटिई गएको प्रहरी टोलीले उनीहरुलाई पक्राउ गरेको प्रहरीले जनाएको छ ।
उनीहरुको साथबाट ५२ पत्ती तास र नगद ३ हजार ३ सय २० रुपैयाँ नियन्त्रणमा लिई जिल्ला प्रहरी कार्यालयमा ल्याई अनुसन्धान गरिएको जिल्ला प्रहरी कार्यालयले जनाएको छ ।
स्थानीय बासिन्दाहरुका अनुसार तल्लो छिर्कनमा एकै घरका सासु, बुहारी अमाजु सहित भएर रमाईलोको लागि तास खेलिरहेको अवस्थामा प्रहरी गई उनीहरुलाई पक्राउ गरि ल्याएको थियो ।
