दमौली, असार २५
शुक्लागण्डकी नगरपालिका–६ काउरेमा पहिरोबाट पिडित तथा प्रभावित परिवारलाई सुर्य नेपाल प्रालिले राहत सामग्री वितरण गरेको छ । जिल्ला विपद व्यवस्थापन समितिका संयोजक समेत रहेका प्रमुख जिल्ला अधिकारी जनार्दन गौतमको उपस्थितिमा सोमवार काउरेमा आयोजित कार्यक्रममा पिडित र प्रभावित ६ घर परिवारलाई खाद्यान्न, लत्ताकपडा, टेन्ट लगायतका सामग्री प्रदान गरिएको कम्पनीका मानव संसाधन प्रमुख अञ्जन दुवाडीले जानकारी दिए ।
कार्यक्रममा शुक्लागण्डकी नगरपालिकाका नगर प्रमुख कृष्णराज पण्डित, सुर्य नेपाल प्रालिका व्यस्थापक बाबुराम कार्की, शुक्लागण्डकी–७ का वडाध्यक्ष खड्ग सिं थापा मगर, वडा नम्बर ५ का अध्यक्ष एवम् विपद व्यवस्थापन समिति सभापति दिर्घ बहादुर थापा लगायतको उपस्थिति रहेको थियो ।
यसैगरि नेपाल रेडक्रस सोसाईटी तनहुँले पहिरो पीडित र प्रभावितलाई राहत सामाग्री वितरण गरेको छ । रेडक्रसकर्मीहरुले सोमबार पीडित परिवारलाई भेटी राहत वितरण गरेको हो ।
शुक्रबार रातिदेखि परेको पानीले शनिबार काउरेमा हिरा नेपालीको घरमाथिबाट पहिरो जादा ३ जनाको मृत्यु भएको थियो । उक्त पहिरोमा स्थानीय ४० वर्षीया हिरा नेपाली, ३६ वर्षीया अनिशा बास्तोला र ६५ वर्षीय श्याम भण्डारीको मृत्यु भएको छ ।
