दमौली, साउन ५
जिल्ला प्रहरी कार्यालय तनहुँका प्रहरी उपरिक्षक अपिलराज बोहोराको काज सरुवा भएको छ । प्रहरी प्रधान कार्यालयले बोहोराको राजमार्ग सुरक्षा तथा ट्राफिक व्यवस्थापन कार्यालय सुर्खेतमा काज सरुवा गरेको हो ।
गत २०८० फागुन १ गते तनहुँको प्रहरी प्रमुखको रुपमा आएका बोहोराको छोटो अवधिमै सरुवा भएको हो । विशेषगरि जुवातास नियन्त्रणको क्रममा केही राजनीतिक व्यक्तिहरुलाई मुद्धा चलाएको तथा राजनीतिक दवावलाई वास्ता नगरेपछि उनको सरुवा भएको आंकलन गरिएको छ । बोहोराको नेतृत्वमा पाँच महिनामा लागु औषधका सय भन्दा अभियुक्तलाई पक्राउ गरि मुद्धा चलाईएको छ भने अबैधरुपमा जुवातास खेल्नेलाई दिनदिनै जस्तो पक्राउ गरिएको थियो । एसपी बोहोराको कारण तनहुँका पेशेवर जुवाडेहरु हायलकायल भएका थिए ।
राजनीतिक दवाव सामु नझुक्ने उनको अडानको कारण हाल सत्तापक्ष भएका नेपाली काँग्रेसका नेताहरु अघि अघि देखीनै उनको सरुवा गराउन लागेका थिए । यसअघि गृहमन्त्रालय आफ्नो अनुकुल नहुँदा एसपी बोहोराको सरुवा गर्ने प्रयास सफल भएको थिएन । नेपाली काँग्रेसका केही नेताहरु आफ्नो सरकार बनेको एक साताभित्रै एसपी बोहोराको सरुवा गर्ने भन्दै खुलेआम बताउँदै आएका थिए ।
हुन पनि अवस्था त्यस्तै भएको छ । सरकार परिवर्तन भएर नेपाली काँग्रेसले गृहमन्त्रालय सम्हालेको एक साता नपुग्दै एसपी बोहोराको सरुवा भएको थियो । यसअघि पनि एसपी दिनेशराज मैनालीले नेपाली काँग्रेसका नेताहरुले भनेको आदेश नमान्दा चार महिनामै सरुवा हुनु परेको थियो ।
जिल्ला प्रहरी कार्यालय तनहुँको एसपीमा प्रहरी प्रधान कार्यालयबाट एसपी बिरेन्द्र शाही आउने भएका छन् । उनी प्रधान कार्यालयमा कार्यविभाग सुरक्षा सेवा व्यवस्थापन महाशाखामा कार्यरत थिए ।
