दमौली, साउन १५
म्याग्दे गाउँपालिकाले वडा नम्बर ३ बेल्टार स्थित ठुलो बगैंचामा निर्माण गरेको सुविधा सम्पन्न सभाहल सन्चालन गरेको छ । सोमबार दोश्रो पन्चवर्षिय आवधिक योजना तथा चालु आवको बजेट र कार्यक्रम सार्वजनिक कार्यक्रमको आयोजना गरि उक्त सभाहल सन्चालन गरिएको हो ।
ठुलो बगैंचामा रहेको सार्वजानिक जग्गामा सभाहल निर्माण गरिएको छ । सुर्य÷एमएनसी लोयल जेभी पोखराले भ्याट रकम बाहेक २ करोड ९८ लाख ७२ हजार ६७१ रुपैयाँमा उक्त सभाहल निर्माण सम्झौता गरेको थियो ।
२०७७ चैत २६ गते निर्माण सम्झौता भएको र निर्माण गरिसक्नु पर्ने अवधि २०८१ असार ३० गते भित्र सभाहल निर्माण सम्पन्न भएको प्रमुख प्रशासकीय अधिकृत नारयणप्रसाद अधिकारीले बताए ।
उक्त सभाहल निर्माणको लागि स्थानीय सरस्वती घिमिरेको परिवारले ८ आना जग्गा निशुल्क उपलब्ध गराएका थिए । उक्त सभाहलमा करिब ७ सय जनाको क्षमता रहेको छ । जग्गादाताको परिवारलाई सोमबार आयोजित कार्यक्रममा सम्मान गरिएको थियो ।
सो सभाहल उपयुक्त समयमा उद्घाटन गरिने अध्यक्ष श्रीप्रसाद श्रेष्ठले जानकारी दिए ।
